Çalakîyê ke her hewtê semedê baleantişê serê rewşa tepişeyan yene kerdene no hewte zî rîyê janê Korona ra bi metodê vîdeo konferans ameyî kerdene.

Anqara: Înîsîyatîfê Tepişteyanê Nêweşan rê  Azadîye yê Anqara hewteyê 345. yê çalakîya xo de bale ante rewşa tepişteyo nêweş Lutfî Koço ke Zîndanê Afoyonî de yo ser. Endama Heyetê Rayrberdişî yê ÎHDyî Nuray Çevîrmen vat: ''Koço ke 22 mengî yo zîndan de yo mezgê ci de di kîstî ameyî tespîtkerdene û sereyê ci zî tede hetê ci yê çepî pêro felç ravêrneno. Seba ke rewşa ci giran a ganî cade bêro veradayene.''

Îstanbul:  Komîsyonê Zîndanan ê ÎHDyî yê Îstanbulî zî çalakîya xo ya 473. de bale ante rewşa tepişteyê nêweşî Şemsettîn Ozero ke Zîndanê Bafra yê Samsûnî de yo ser. Vervatoxê komîsyonî Mehmet Acettînî vat: ''Sebebê girankerdişê tecrîdê serê tepişteyan tecrîdê Îmraliyî yo.'' Acettînî grevê vêşanîyo ke 5 mengî xo dima verdayî zî vist vîrî û vat: '' Na çalakîye semedê hîşyarkerdişî yena kerdene. Hema ke çalakîye bêdem-bêdor nêbîya selahîyetdarî ganî wezîfeyê xo bîyarê ca.''

Îzmîr: Komîsyonê Zîndanan ê ÎHDyî yê Îzmîrî zî eşkerayîya online daye û bale ante tengayîya ke tepişteyî ancenê ser. Eşkerayîya ke hetê endamê komîsyonî Ahmet Çîçekî ra ameye kerdene de bale ameye atene serê rewşa tepişteyê nêweşî Devrîm Ayîko ke Zîndanê Eskîşehîrî de yo ser. Çîçekî ard ziwan ke loqleyê Ayikî helisîyene  û vat: ''Ayik sînorê mergî de yo. Netîceya ci ra îqtîdar berpirsîyar o.''

Eşkerayîyan de ame vatene ke heme heqê tepişteyan yenê binpaykerene û bitaybetî zî tepişteyê nêweşî mergî rê ameyî caverdayene û veng dîya berpirsîyaran ke wazîfeyê xo bîyarê ca. Reyna rayapêroyîye ra zî ame waştene ke wa vera tepişteyan hîsgêr bê.