Goreyê doneyanê Komeleya Heqanê Merdiman (ÎHD) zîndanan de hezar û 564 tepişteyê nêweşî est ê ke rewşa 651ê înan giran a. Nînan ra yew zî Devrîm Ayiko 33 serre yo ke astengdar o.

Ayik 2015 de Îzmîr de wexto ke Kovara Ozgur Halkî vila kerdêne pa 13 embazanê xo amebi destbendkerdene û dima zî 'endamîya rêxistine' ra tepişîya. 

Ayiko ke Zîndanê Edîrne de tepişte yo, 2018 de meseleya weşîye ra tepişîyabi la çeleyê 2021î de ancî tepişîyabi. 

Dadîya Ayikî Hulya Ayik derheqê rewşa lajê xo de ANFyî rê qisey kerd.

Ayikî dîyar kerd ke weşîya lajê ci xirabêr bena û waşt ke wa cade lajê ci seba tedawî sewqê Zîndanê Antalya bêro kerdene. Hulya vat: ''Muracatê ma seba sewqkerdişî ame redkerdene. Wextê sewqê nêweşxaneyî de zî cigêrayîşê zereyê fekî yeno ferzkerdene. La seba ke lajê mi no qebul nêkerd cezaya dîsîplînî dîyena ci.

Wa cade peynîya nê kerdişanê keyfîyan bêra ardene. Wa cade tecrîd biqedo. Eke zîndanan de çîyo xirab biqewimîyo mesuldarê ci Wezîrê Edaletî û îdareyê zîndanan ê. Ma wazenê cade peynîya nê zulmî bêra.''