Rêxistinê elewîyan çarçewaya kampanyaya ke vera dersa dînî ya mecbûrîye  yena domnayene de 27ê sibate (siba) Rihtimê Kadikoyê Îstanbulî de bi şîarê ''Demokrasî û Laîkîye'' do mîtîng bikerê.

Mîtîng serkêşîya Federasyonê Elewî Bektaşî, Federasyonê Komeleyanê Elewîyan, Federasyonê Waqfanê Elewîyan zî tede 13ê rêxitenê elewîyan ê serbanî de do bêro kerdene. Yeno pawitene ke partîyê sîyasîyî, rêxitinê komelê sîvîlî û xeylêk kesî paştî bidê mîtîngî. Pîya bi nê mîtîngî bi hewayêkê hemwextî her hetê Tirkîya û Vakurê Kurdîstanî de eşkerayîyî do bêrê dayene. Temsîlkaranê rêxitinanê elewîyan semedê tewrbîyayîşê mîtîngî ven ga.

Hemsereka Komeleyanê Elewîyan ê Demokratîkan (DAD) Kadrîye Dogane ard ziwan ke no mîtîng semedê ameyoxê komelî zaf qiymetin o û vat: ''Îqtîdar ma rê şerîat dano ferzkerdene. Ma nê mîtîng de vera nê vejîyenê, vanê ma nê qetî qebul nêkenê. Waştişê ma sey wa dersa dersa dînî ya mecbûrîye bêro wedaritene, wa qerarê Mehkemeya Heqanê Merdiman ê Ewropa bêrê caardene, wa perwerdeyê ziwanê dayîke bêro naskerdene, wa polîtîkayê asîmîlasyonî yê vera elewîyan bêrê qedînayene estê.  Ma haştîye komelkî û hemwelatîya seyyewbîne wazenê. Kam ke edalet, azadîye û seyciyîye wazeno wa tewrê mîtîngê ma bibo.''

Hemserekê Pêroyî yê Federesyonê Komeleyanê Elewîyan Celal Firatî zî îfade kerd ke ê do semedê caardişê heqanê elewîyan û naskerdişê cemxaneyan meydanan de bî û veng da ke semedê demokrasîyî wa her kes tewrê mîtîngî bibo û vera neheqîye vengê xo berz bikero.