Wekîlê DEM Partî Berdan Ozturkî hêrişê Tirkîya û cerganê ci yê Artêşa Milî ya Sûrîye (SMO) yê vera Rojawanî ercnayî. 

Ozturkî vist vîrî ke bi rijîyayîşê rejîmî cergan cade hêrişê Til Rifet û Minbicî kerdo û var: ''No bi xo mojneno ke dewleta tirke dişmenîya kurdan kena. Kurdan Minbic bi xoverdayîşêkê pîlî destê cerganê DAÎŞî ra xelisnabi. Ewro zî Minbic de şar yeno qetilkerdene. Minbic de vera merdimatîye sûcî yenê kerdene ke îqtîdarê AKP-MHPyî zî şirîkê nê sûcan o. Kurdî senî ke wayîrê Kobanê vejîyabî ewro zî wayîrê Minbicî vejîyenê û xo ver danê. Hêvîya yewîya neteweyîye bena pîlêr. Kobanêya ke dewleta tirke nêeşkaya bi destê DAÎŞî çin bikera ewro hedefê cerganê aye SMOyî de ya. Dewleta tirke wazena ke xoverdayîşê kurdan bişikna û qesasê DAÎŞî zî bigêra.

Rijîyayîşê rejîmê Esadî reyde modelêko newe seba Sûrîye gêrîyeno. Modelê Îdareyê Xoserî seba şaranê Sûrîye modelêko tewr raşt o. Şarê Rojawanî keno ke vera hêrişanê dewleta tirke modelê Îdareyê Xoserî bipawo.

Rixmê hêrişanê dewleta tirke û cerganê ci zî waro mîyanneteweyî bêveng o. Ganî statuyê Îdareyê Xoserî bipawîyo. Modelê Rojawanî seba pawitişê demokrasî mîsalêk o. Rayaumûmîya mîyanneteweyîye coka ganî vera hêrişan tewirê xo bimojna. Ganî paştdayîşo mîyanneteweyî bêro xurtkerdene. 

Hêrişê vera Îdareyê Xoserî teyna vera kurdan ney vera ereban, armenîyan û sûryanan zî yenê kerdene. Şarê kurdî zî ganî vera nê hêrişan bi ruhê yewîye têbigêro. Hêrişê vera sîstemê Îdareyê Xoserî hêrişê vera erjanê merdimatîye yê.

Oyo ke Rojawan de pawîyeno rûmetê ma yê pêroyînan o. Bê yewîye ma nêeşkenê rûmetê xo bipawê. Eke ewro ma vengê xo berz nêkerê siba do erey bibo. Ganî ma paştdayîşê bi Rojawanî pîlêr bikerê. Pawitişê Rojawanî erkê pêro merdimatîye yo. Ewro ganî ma anxî vera hêrişan vajê  'Bijî berxwedana Rojava'."