Riha de şaredarîyê 7 qeza û şaredarîya merkezî weçînayîşanê 31ê adare de destê AKPyî ra şîyî. AKPyî weçînayîşanê gulane de se ra 60 rayî girewtbî la narey se ra 30 rayî girewtî. 

Hemvervatoxa Komîsyonê Huqûqî yê DEM Partî Sevda Çelîk Ozbîngol ANFyî rê qewimîyayîşê Riha ercna.

Sevda pare kerd ke waştişê vurîyayîşê şarî sindoqan de xo eşkera kerdo û vat: ''Riha de şarî rewî ra vurîyayîş waştêne. Tabloyê Riha fotografê binkewtişê îqtîdarî yo. Coka îqtîdar hende mudaxeleyê netîceyanê weçînayîşan ê Riha keno. Riha de her çi vurîya. Riha wazena ke bi ferasetê şaredarîya şarî bêra îdarekerdene. Coka 7 qezayan de şarî DEM Partî tercîh kerda.''

Sevda ard ziwan ke DEM Partî Riha de rixmê pêro teda, hêriş û mudaxeleyan têkoşînê xo rê dewam kena û vat: ''DEM Partî şarî reyde sîyasetê şarî kena. Kadroyê ma mîyanê şarî ra yê. Prosesê weçînayîşan de namzedanê ma her kuçe de xebatî kerdî û şarî reyde xo kerd yew. Şarî bi tesîranê nê xebatan verê xo da DEM Partî. Şarê Riha bire daye ke vera ferasetê qeyûman ferasetê demokratîkî rê destek bido.''

Sevda vist vîrî ke Riha de wextê weçînayîşan de pusulayê rayan ameybî vêşnayene, hêzê asayîşî endamanê AKPyî reyde têgêraybî la rixmê ney zî şarî DEM Partî tercîh kerda. Sevda vat: ''Şar wayîrê îradeyê xo vejîya. Curnê Reşî de endamanê AKPyî eşt dibistanan ser, pusulayî vêşnayî û wezîfedarî derb kjerdî. Nê sûcan ra tay kesî tepişîyayî ke mîyanê înan de merdimê namzedê AKPyî zî est ê. Xelfetî de qeyûmî bi merdimanê çekdaran waşt ke mudaxeleyê weçînayîşan bikero. Ganî kerdişê winayênî hinî biqedê û îradeyê şarî rê hûrmet bêro kerdene.''