Îstanbul de Nobeta Edaletî hewteyê 39. de pê rayraşîyayîşêko girseyî qedîyaye. Rayraşîyayîş bi şîarê 'Tepişteyanê nêweşan û tepişteyanê ke înfazê înan ameyo vêşnayene rê azadîye, tecrîdî rê bes o', Kadikoy de hetê MATUHAY-DER, ANYAKAY-DER û BMGyî ra ame kerdene.

Çalakîkera waşt ke tecrîdê Îmraliyî biqedo. Sere de merdimê tepişteyan temsîlkarê rêxistinanê heqanê merdiman, dezgehan û sîyasetmedarî tewrê çalakîye bîyî.

Rayraşîyayîşî ra verî polîsan xeylêk noqtayî girewtî binê ablûqa. Polîsan veerî muxabîrê Arti TV Umut Taştan derb kerd û muxabîro bîn ê Arti TV Mehmet Zekî Kaya zî destbend kerd. Dima polîsan Wekîlê HDPyî Zuleyha Gulum û Musa Pîroglu girewtbî binê ablûqa. Wekîlan bi sloganan polîsî protesto kerdî.

Bi seyan kesan zî Kuçeyê Kurbagalidere de bi sloganê 'bijî Serok Apo' rayraşîyayî kerd. Tîya de merdimanê tepişteyan ra Kumrîye Akgul qisey kerd û waşt ke hînî zîndanan ra cenazayî mevejîyê.

Polîsî hêrişê nê girseyî zî kerd. Polîsan laçikê dadîyan ra kaş kerd û paskilî da înan ro. Polîsan kerd ke lingê dayîke Zeynepe Calihan bişiknê û xeylêk kesî pey ra destbend kerdî. Polîsan Hemserekê HDPyî yê Îstanbulî Ferhat Encuyî rê zî lapatêk eşt. Polîsan Wekîlê HDPyî yê Şirnexî Hasan Ozguneş û rojnamegeran rê zî nêngî çinayî.

Rixmê hêrişê polîsan zî girse bi çepik û sloganan rayîr a şi. Polîsan reyna dadîyî girewtî binê ablûqa û înan rê îşkence kerd. Polîsan tîya de pêro girse destbend kerd.

Kuçeyê Karakolhaneyî de zî girseyo ke tede Mayê Haştîye zî est bîyî bi slogananê sey 'jin, jiyan, azadî', 'bijî berxwedana zîndanan' rayîr a şi. Hemwelatîyan zî pê çepik û nîşaneya serfîrazîye paştî daye girseyî.