Paytextê Almanya Berlin de vizêr bi hezaran kurdîstanijî seba protestokerdişê hêrişanê îşxalî û hemkarîya PDKyî ameyî yewca. Kurdîstanijan serê sibayî dest pê rayraşîyayîşêkê girseyî kerd. Rayraşîyayîş de sloganê sey 'Biciwîyo xoverdayîşê gerîlayan', 'Biciwîyo xoverdayîşê Zapî', ameyî vatene, pankart û afîşê ke bale antêne hêrişanê kîmyewîyan ameyî akerdene.

Rayraşîyayîş de hunermendan Hozan Şemdîn, Hozan Hekîm Sefkan, Cewad Merwanî, Hozan Aydîn, Pewyan Arjîn, Dîlan Dersim û Ozgur Riha bêmabên deyîrî vatî. Girseyî wexto ke eşnawit cenazaya Aysele Dogan Dêrsim de ameye astengkerdene sloganê 'şehîdî nêmirenê' vat. Ciwanan zî goş nêda provakasyonanê polîsanê almanan û merşê 'Çerxa Şoreşê' vat.

Polîsanê almananê ke eslê xo de tirk bîyî, verê slogananê 'Biciwîyo Serek Apo', 'Biciwîyo PKK' de tehamul nêkerd û hêrişê girseyî kerd. Polîsan xeylêk kesî birîndar kerdî, 15 kesî destbend kerdî û girseyî bi sloganan hêrişê polîsan şermezar kerd. Girseyî rixmê hêrişê polîsan zî sloganê 'Biciwîyo Serek Apo' vat.

Warê mîtîngî de Hemserekanê KON-MEDî Zubeyde Zumrut û Engîn Sever, Wekîla Partîya Çepgîre Gokay Bulut û Wekkîlê verênî yê HDPyî Ahmet Yildirimî qisey kerd û înan hêrişê îşxalî yê dewleta tirke şermezar kerdî.

Mîtîng bi deyîranê Hozan Comerdî qedîya.