Meclîsê Cinîyan ê HDPyî, Mayanê Haştîye û Têgêrayîşê Cinîyan ê Azadan (TJA) Şubeyê Îstanbulî yê Komeleya Heqanê Merdiman (ÎHD) de kombîyayîşêk kerd.

Kombîyayîş de eşkerayîyêk ameye kerdene û pankarta bi nuşteyê ''Vizêr Roboskî ewro Til Rifat, Ganî qirkerdişê domanan biqedê" ameye daliqnayene.

Kombîyayîş de Sekretera Şubeyê Îstanbulî yê ÎHDyî Lemane Yurtsever qisey kerd û vat: "Hêrişê Tirkîya yê vera Rojawanî de zaf sivîlî ameyî qetilkerdene. Komara Tirkîya seba ke kurdan çin bika nê hêrişî kerdî û sivîlî kiştî. Menga kanûne de zî 8 domanî kiştî. Tirkîya ganî cade hêrişanê xo yê vera Rojawanî ra fek vera bida. Kesêk zî şer de ser nêkeweno. Haştîye ser kewena, şer bin kewena."

Hemsereka HDPyî ya Îstanbulî Elîfe Bulut vat: "Şer ra her tim cinîyî û domanî zerarêkê tewr pîlî vînenê. Ma venga cinîyan danê ke vera taxrîbatê şerî ma pîya têkoşîn bikê û vengê xo berz bikê."

Endama Însîyatîfê Mayanê Haştîye Cemîle Çîftçî vat: "Hînî wa domanî nêmirê. Wa şer biqedo. Ma wazenê ke nê welatî de haştîye biba."

Eşkerayîya hempare hetê aktîvîsta TJA Pinare Kandal ra ameye wendene. Eşkerayîye de ame balantene ser ke menga kanûne do sey menga mergî û qirkerdişî vîrê merdiman de ca bigêra. Eşkerayîye wina ya: "Ma domananê Roboskî, Sûrîye, domananê multecîyan, domananê Halepçe, domanê Şengalî, domananê Uygurî, domananê Yemenî û domananê Nîjerya yad kenê ke ameyî qetilkerdene. Ma dinyayêka winasêne nêwazenê ke domanî tede bi bombayan, mayînan, qedexeyanê vejîyayîşê teberî, tacîzan yenê qetilkerdene. Seba ke domanî nêrê kiştene wezîfeyêko bingeyîn ma ser o yo. Ganî ma biqîrê û vajê ke şerî zerar danê pêro komelan û xoza. Ma venga pêro cinîyan, dadîyan, komelan, rayaumûmîye û komelê mîyanneteweyî danê ke wayîrê domananê ma bivejîyê û domanan bidê ciwîyayene."