Goristanê Garzanî yê dewa Oleka Jorî yê Bedlîsî, 17ê kanûna 2017î de ame rijnayene û 282 cenazayî ameyî remnayane bi Dezgehê Tipê Edlî yê Îstanbulî. Dima eşkera bi ke cenazayî zereyê kutuyan ê plastîkan de kişta rayîrî yê Goristanê Kîlyosî de ameyê definkerdene. Heta nika nê cenazayan ra 21ê ci keyeyan rê ameyî teslîmkerdene. Xeylêk keyeyan seba cenazayan muracat kerd la cewabêk nedîya înan.

Gerîlaya PKKyî Aynure Gumuş 1995 de Tetwan de pêkewtişêk de şehîd bîye. Aynure de pa embazanê xo tewra PKKyî bîye. Keyeyê Gumuşî  1995î ra nata gêreno cenazaya kênaya xo. Babî  Zîya Gumuşo ke bi serran têkoşîn kerd, serra 2003î de dinyaya xo bedilnaye. Dadî Mutebere Gumuş 26 serrî yo bêmabên cenazaya kênaya xo gêrena.

Dayîke Mutebere senî eşnawena ke 282 cenazayî Goristanê Garzanî ra ameyê berdene bi Goristanê Kîlyosî têgêrena û muracatê Serdozgerîya Komare ya Bedlîsî kena. Rixmo ke di serrî verî aye seba testê DNA numuneyê gonîye da hema zî cewabêk nêdîya muracatê ci. 

Dayîke Mutebere bi wesîleya Roja Dadîyan Jinnewsî rê qisey kerd û vat: "Ma bizanê ke cenaza ça de ya  zerrîya ma pê bena rehet. La ma nêzanenê, agahîyêke nêdîyena ma. Semedê tedayan ma 26 serrî verî Bedlîsî ra ameyî Îstanbul. Werto ke tutanê ma heywanî çêrnayêne leşkeran tutê ma kuwayêne, şîdet înan rê kerdêne. Leşkeran pê çekan vernîya vistewreyê mi girewt. Dewlete pesê ma girewt û apet nêda."

Dayîke Mutebere pare kerd ke ê tim maruzê tedaya dewlete mendî.  Dayîke Mutebere vat: "Wextê ke ma şaristanê xo de bîyî, kênaya mi tewra PKKyî bîye. Ma semedê tedayan şîyî Wan. Uca de zî tedayan dewam kerdî. Hêzanê dewleye kênaya min a pîle kuwaye, ez zî kuwaya. Înan ma Wan de zî rehet nêverdayî. Hertim eştêne serê keyeyê ma. Pê çekan kewtêne zere û vatêne ê do ma bikişê. Mi vatêne tutanê mi mekişê û mi xo eştêne verê berî. Înan ajê mino ke şîyêne mektebe tepişt û tira îşkence kerdî. Wexto ke tutê mi vera dîya, nêmmerde ame. Xeylêk teda ma rê ameya, ma vera tedayan koç kerd."

'Seke ruhê mi bedenê mi ra ameyo vetene'

Dayîke Mutebere da zanayene ke înan Îstanbul de zaf feqirîye ante û vat: "Ma zaf feqîrîye dîye. Tutê mi nêxebitîyayêne. Ma hetê ekonomî ra zaf zehmetî antî. Mi televîzyon de dî ke cenazayê Garzanî, Kîlyos de defin bîyê. O wext mi vat qey ruhê mi bedenê mi ra ameyo vetene. Vera merdeyan zî kînê înan esto. Gelo tersê înan Homayî ra çin o. Çira wina kenê. Çira destûrê nêdanê ma cenazayanê xo bigêrê. Ez hîrê rojan bermaya. Ê dîmenî zerrîya mi dejnayî. Wa Homa nê zulmî qebul nêkero. Ma se kerd ke ê nê zulmî ma rê kenê. Heqê ma esto ma bizanê ke cenazayê ma ça de yê. Ê senîn şinê serê gorê xo, ma zî wazenê şêrê. No heqê ma yo. Ma bizanê ça de yê zerrîya ma pê rehet bena. Dewlete cenazayan ra tersena. Eke tersê înan Homayî ra bibîyêne do wina nêkerdêne. Wina pê ma heqaret kenê. Ê se kenê bikerê ma heta peynîya emrê xo têkoşînê xo rê do dewam bikerê. Ma koçber bîyî. Cenazayê tutanê ma vînîbîyaye yê. Înan çîyêk nêverdayî. Gelo do no zulm heta key dewam bikero. Do heta key qedexe bikerê. Ma heme zulm û teda dîyê."

'Ez cenazaya kênaya xo wazena'

Dayîke Mutebere tewr peyên derheqê Roja Dadîyan de wina vat: ''Waştişê min o yewin cenazaya kênaya min a. Ez bizana cenazaya kênaya mi kamca de ya zerrîya mi pê bena rehet. La nêzanena. Qet yew agahîye nêdîyena ma.''