Ciwanê kurdî vizêr serê sibayî şaristanê Hannoverî yê Almanya de kom bîyî û înan seba ke azadîya Rayberê Şarê Kurdî Abdullah Ocalanî û şermezarkerdişê komploya mîyanneteweyîye dest pê rayraşîyayîşî kerd. Roja destpêke ya Rayraşîyayîşê Dergî şar şaristanê Lehrte de qedîyaye.

Almanya, Fransa, Avusturya, Swêd, Hollanda, Îspanya, Îngilîstan û Swîsre ra nêzdîyê 250 ciwanî tewrê rayraşîyayîşî bîyî. Rayraşîyayîş bi sloganê 'Seba azadîya Rayber Apoyî pîya serewedaritiş' ame kerdene.

Çalakîye Hannover de taxa Steintorî de dest pêkerd ke Halîm Dener tede kişîyabi. Çalakîkerî qasê 20 kîlometreyan rayîrî ra şîyî.

Çalakîkeran yelegê kesk, sûr û zerî xo rê dayî ke verê înan de vatişê 'Peynîya ci wa bi heybet bo' yê fermandar Çîyagerî û peyê yelegan de zî vatişê 'Seba azadîya Rayber Apoyî pîya serewedaritiş' ameybî nuştene.

Rayraşîyayîş de pankartê sey 'Seba azadîya Ocalanî pîya serewedaritiş', 'Heftanîn do bibo goristanê îşxalkeran' ameyî akerdene û sloganê sey 'Biciwîyo Xoverdayîşê Heftanînî', 'Biciwîyo paştdayîşo mîyanneteweyî', 'Bê serek cuye nêbena' ameyî qirkerdene.

Çalakîkerî Lehrte de salonêke de kom bîyî û înan mabênê çay û werdî da, roja xo ercnaye. Hetê bînî ra seba plankerdişê rojanê rayraşîyayîşan komîsyonêk ame awankerdene.