Serekwekîla Koma DEM Partî Gulîstane Kiliç Koçyîgît Meclîs de kombîyayîşê çapemenîye kerd û vera destsernayîşê şaredarîyan tewir mojna. 

Gulîstane nê çîyî ardî ziwan: ''Ewro rejîmê qeyûman yew kerdişê Rewşa Îstîsnayî bîyo. 4ê teşrîna peyêne ya 2016î de vera HDPyî darbeyêka pîle amebî kerdene,  sere de Demîrtaş xeylê embazê ma tepişîyabî. Ancî ewro 4ê teşrîna peyêne de qeyûmî tayînê şaredarîyanê ma ameyî kerdene.

Ma vera nê kerdişan û darbeyan têkoşîn kenê. Êyê ke vera xespkerdişê tayînan bêveng mendê dima ke Esenyurtî rê qeyûm ame tayînkerdene şoq bîyî. Îqtîdarî no welat vurna welatê qeyûman.

Ahmet Turkî hewteyêkî verî hetkarê Serekkomarî reyde heman fotograf de bi la ewro bîyo terorîst. 

Ewro roje roja pîya xoverdayîşî ya. Ganî ma vera nê zulmî yew bibê. Eke ma xo ver nêdê welat ver bi kaosî do şoro. Wa pêro rêxistinî, dezgehî, şarî û cinîyî vera nê kerdişê antîdemokratîkî yew bibê. MYKyê ma ho rayîr de yo şino Êlih û Mêrdînî. Ma do îradeyê şarê xo heta peynî bipawê. 

Bahçelîyî qaşo 'seba haştîye' destê xo derg kerdbi. La hetê bînî ra îqtîdar ho qeyûman tayînê şaredarîyanê ma keno. Eke şima haştîye wazenê ke qeyûman ra fek vera bidê.''