Azîz Oruç Bazîdê Agirî de 11ê kanûne de amebi destbendkerdene û hetê Wezaretê Karanê Zereyî ra sey 'terorîst' amebi îlankerdene. Oruç wextêk ra dima sewqê Mehkema Cezaya Sulhî ya Bazîdî ame kerdene. Mehkeme bi îdîaya 'endamîya rêxistine' Oruç tepişt û erşawit zindanî.

Rojnamegerê kurdî rîyê dewayanê derheqê xo de ra 3 serran ra nata Başûrê Kurdîstanî de rojnamegerîye kerdêne. Oruçî wexto ke Îranî ra şîyêne Ermenîstan hetê polîsanê armenîyan ra ame destbendkerdene û maruzê şîdetî bi. Oruç dima leşkeranê Îranî rê ame teslîmkerdene û 2 rojan zî maruzê îşkenceyê înan bi. Oruç şewa 10ê kanûne de têlanê sînorî ser o ame eştene hetê sînorê Tirkîya ser. Azîz Oruçî 11ê kanûne de hetê polîsanê tirkan ra ame destbendkedene. Heman roje Muhammet Îkram Muftuoglu û Hemserekê HDPyî yê Bazîdî Ekelek bi îdîaya ''hetkarîye'' amebî tepiştene.

200 ra zêdêr rojnamegeran seba ke Oruç bêro veradayene  Change.org ser o kampanyaya îmza daye destpêkerdene.