Xoverdayîşo tarîxî yê Awbendê Tişrînî yê 51 rojan bi cesaret û qeradarîya şervananê YPJ û QSDyî tarîx de cayê xo geno. Hêrişanê giranan ê dewleta tirke yê ke 8ê kanûna 2024î de dest pê kerd raştê xoverdayîşê şervanan û şarê herême ameyî. Rojanmegere Dîlovan Asmîna ke şahîdîya nê xoverdayîşî kerd û îradeyê şervanan ke heta nefesê xo yê peyênî şer kerd û fîna çiman ver 21ê çeleyê 2025î de birîndare bîye.

Dîlovane Asmîn bale ante muhîmîya Awbendê Tişrînî ser û nê vatî: ''Vera Tişrîn û dormeyê ci hêrişê giranî benê û vera nê hêrişan xoverdayîşo tarîxî yeno dayene. Şervanê YPJ û QSDyî şertanê tewr zoran de zî bi îradeyêkê xurtî cewab danê nê hêrişan. Şervanî têna semedê keyeyanê xo nê semedê heme şarê herême xover danê. Awbend hewcedarîya awe û enerjî yê bi mîlyonan merdiman ano ca. Coka no xoverdayîş, xoverdayîşê estbîyayîşî yo. Awbendê Tişrînî semedê nasname û ameyoxê şarî sembolêko krîtîk o.''

Rorjnamegere Dîlovan Asmîn wina dewam kerd: ''8ê çeleyî ra nata şaro ke bi konvoyan resa awbendî rixmê hêrişanê îşxalkeran bi hewayêkê qerardarî nobete tepişeno. Şarî bi waştişê pawitişê awe, enerjî û herra xo Awbendê Tişrînî de nobete tepişenê. Şarê ke resayî awbendî merkezê şerê estbîyayîş û çînbîyayîşî de ca genê. Şaro ke nobete tepişeno hewa û erdî ra raştê hêrişan yeno. Nê merdimê ke rixmê qirkerdişanê ke ameyî kerdene xoverdayîşê xo domnenê, semedê ameyoxê şaran bi hewayêkê qerardarî xover danê.''

Dîlovane Asmîn ard ziwan ke xoverdayîşê Awbendê Tişrînî de rojamegerî zî zordarîye ance û nê vatî: ''Rojnamegê ke warê şerê giranî de xebiteyenê xora şehadet zî genê çim. Ê pê hedefgitewtişê rojnamegeran nêeşkenê roşnê heqîqetî hewna bikerê. Cîhan û Nazim peyê heqîqetî de şehîd bîyî la qelem û kamerayê înan erdî de nêmendî. Xoverdayîşê Tişrînî heqîqetî dano eşnawitene. Qirkerdişê ke tîya benê ma bi kamerayanê xo dinya rê dayî eşnawitene la hema zî komelê mîyanneteweyî vera nê sûcanê şerî bêveng o.''