Vera Hemserekê Pêroyî yê ÎHDyî Ozturk Turkdoganî bi îdîaya 'endamîya rêxistine' dewa amebî akerdene. Roniştişê dewa Mehkemeya Cezaya Girane ya Anqara de ame kerdene.

Hemsereka Pêroyî ya ÎHDyî Erene Keskîn, avûkatê Komeleya Huqûqnasan a Seba Azadîye (OHD) û Komeleya Huqûqnasanê Hemdeman, Wekîlê HDPyî Omer Faruk Gergerlîoglu û temsîlkarê xeylêk partî û rêxistinanê komelê sivîlî tewrê roniştişî bîyî.

Turkdoganî roniştiş de pare kerd ke na dewa şexsê ey de vera pêro pawitoxanê heqanê merdiman ameye akerdene û dewa armanc kena ke çimê înan bitersna. Turkdoganî vat: ''Ez vana na dewa bi fermanê Wezîrîya Karanê Teberî ameya akerdene. Ez do xebatanê xo dewam bikera.''

Avûkat Kerem Altiparmakî waşt ke îdîaname wa bêro îadekerdene. Avûkatanê dewa ra Erene Keskîn zî pare kerd ke Tirkîya pêro peymananê mîyanneteweyîyan binpay kena.

Heyetê mehkeme roniştiş taloqê 19ê nîsane kerd.

Îdîanameyê dewa de eşkerayîyê Turkdoganî yê serê Garê, tecrîdê Îmraliyî, binpaykerdişanê heqanê tepişteyan sey sûcî ameyê mojnayene. Îdîaname de bi îdîaya 'endamîya rêxistine' yeno waştene ke cezaya zîndanî ya 7 serran ra heta 15 serran bêra dayene Turkdoganî.