Kurdîstan û Tirkîya de krîzo ekonomîk û enflasyon vera zêdîyenê coka vera bedelê kîra zî zêdîyeno, vay beno. Roniştoxanê Amedî derheqê babete de ANFyî rê qisey kerd.

Azîz Keleşî ard ziwan ke o bi serran o keyeyan dano kîra la heta emserî bedelê kîra hende vay nêbibi. Keleşî vat: ''Merdimê ke meaşê înan kêm o, hînî nêeşkenê bibê wayîrê keyeyî. Herême de nufus zî zêde yo. Coka merdimî neçare manenê ke taxanê kedkaran de ca bibê. Nê taxan de kîra 800 ra heta 1500 lîra yo. Wexto ke merdim fatura û şîyayeyanê mitbaxî zî zêdîneno, hînî meaş çîyêkî rê nêvejîyeno.''

Dikandar Recep Ozalpo ke kîra de yo, îfade kerd ke wextê janî de ê ameyî mexdûrkerdene û vat: ''Wextê janî de kîrayî se ra 100-150 zêdîyayî. Dikana ke kîraya ci 700-800 bibî, bîya 2 hezar û 500 lîra. Wayîrê mulkî kesanê verênen mulkê xo ra vejenê û bi nê hawayî vayan zêdînenê. No zî bi giranî tesîrê ma keno. Ma wextêkê winasênî de yê ke nêeşkenê nanî zî berê domananê xo.''

Xatûne Guldaliya ke kîra de ya, pare kerd ke kîra 2 heta 3 hezar bîya û vat: ''Merdimî cara meaşê kêmî gênê. Ma meaşê xo bidê kîra yan faturayan yan  zî mitbaxî? Faturaya awe 150 heta 200 yena, faturaya ceyranî 400 lîra yena. Ma nêeşkenê ney bidê. Coka ganî heqê kîra û faturan kêm bibê. Meaşê ma yê kokimîye şino faturayan, ma rê çîyêk nêmaneno.''

Mekîye Bozkurt zî waşt ke wa bedelê kîra û faturayan bêrê kêmkerdene û vat: ''Vaybîyayîşî ra ma nêeşkenê çîyêkî bihêrînê. Pendîr bîyo 60-70 lîra, kîloyêkê firîngan bîyo 10 lîra, rûn bîyo 200 lîra. Ma hînî nêeşkenê meywe bihêrînê. Çar wendekarê mi est ê. Ez senî înan rê mesraf bikera? Nêzanena se bikera.''