Roşanê Ganîbîyayîşî ame fîrazkerdene

Şaristananê Marsîlya û Bordeauxî yê Fransa û Şaristanê Lavrioyî yê Yunanîstanî de serrgêra ronayîşê PKKyî ameye fîrazkerdene.

Ewropa de şayîyê fîrazkerdişê Roşanê Ganîbîyayîşî dewam kenê. Vizêr Fransa û Yunanîstan de Kurdistanijan û dostanê înan bi aktîvîteyan serrgêra ronayîşê PKKyî fîraz kerde.

Marsîlya

Şaristanê Marsîlya yê Fransa de aktîvîstanê Têgêrayîşê Ciwananê Şorişgêran serrgêra ronayîşê PKKyî fîraz kerde. Kurdan û dostanê înan rayraşîyayîşêko bi meşaleyan serûber kerd û pankarta bi fotografanê Rayberê Şarê Kurdîstanî û qadroyê verên ê PKKyî ya ke ser o ''Serra 42. a PKKyî fîraz biba'' nuştêne kirişte. Rayraşîyayîşî de alayê PKK, YPG, YPJyî ameyî berzkerdene û sloganê ''Seba Ocalanî Azadîye'', ''PKK şar o, şar tîya de yo'' ameyî vatene. Rayrşîyayîşî de hêrişê Dewleta Tirke yê vera Rojawanî ameyî şermezarkerdene û kuçeyê Juliette ser o alaya PKKyî ameye daliqnayene.Rayraşîyayîşî ra dima Meydanê Vieux Portî de nawnayîşêk ame kerdene. Deqayêkê rêzgirewtişî ra dima zî bi fîşekanê hewayî serrgêra ronayîşê PKKyî ameye fîrazkerdene.

Bordeaux

Şaristanê Bordeauxî yê Fransa de çalakîkeranê Têgêrayîşê Ciwananê Şorişgêran rayraşîyayîşêkê bi meşaleyan roşanê ganîbîyayîşî fîraz kerd. Rayraşîyayîşî de sloganê ''Ma pêro PKK yê'', ''Bêserek cuye nêbena'' ameyî vatene û çarçewa hemleya ''Meverdê'' de pankarta ''Sere Wedarê, Rojawanî Bipawê'' ameye kiriştene.
Rayraşîyayîşî bi marşa ''Çerxa Şoreşê'' dewam kerd û seba şehîdanê şorişî deqayêkê rêzgirewtişî ra dima bi sloganê ''Şehîdî Nêmirenê'' qedîya.

Lavrio

Şaristanê Lavrioyî yê Yunanîstanî de bi wesîleya serrgêra ronayîşê PKKyî rayraşîyayîşêkê bi meşaleyan ame kerdene. Bi seyan kesî tewrê rayraşîyayîşo ke hetê Têgêrayîşê Ciwananê Şorişgêran ame sazkerdene bîyî. Rayraşîyayîşî de alayê PKK, KCK, YPG û YPJyî û posterê Abdullah Ocalanî ameyî kiriştene. Rayraşîyayîşî kampa Lavrioyî ra dest pêkerd. Rayraşîyayîşî de sloganê ''Biciwîyo Serek Apo'', ''Bêserek cuye nêbena'' ameyî vatene. Qiseykerdişan ra dima çalakîya rayraşîyayîşî bi sloganan qedîyaye.