Dr. Michael Rubino ke Enstîtuyê American Enterprise de cigêrayîşanê xo dewam keno, serranê 2000î de Wezaretê Pawitişî (Pentagon) de xebitîya. Rubinî waşt ke Dewletê Yewbîyayeyî yê Amerîka (DYA) têkilîya xo yê bi Tirkîya û kurdan newe ra biercnê û veng da ke sûcdarîya 'terorîzmî' newe ra bêra çimeştene.

Rubinî North Press Agencyî reyde qisey kerd û vat: ''Ganî DYA bi lezabezî cayê PKKyî yê mîyanê lîsteya terorî de newe ra biercna. Zanayîşê ke Tirkîya derheqê PKKyî de pêşkêşê DYA kena pêro zûrî yê. Nê zanayîşê ke îstîxaratê tirkan danê gemarin ê. Oyo ke Hamas Filîstîn de keno, cergê DAÎŞî Sûrîye û Iraq de kenê terorîzm o. Labelê kerdişê Îdareyê Xoserî yê  Rojawanî mojnenê ke propagandaya Tirkîya zûrî ya. ''

Michael Rubinî bale ante têkoşînê kurdan ê vera şîdetê Sûrîye ser û vat: ''Kurdî partnerê DYA yê ke wayîrê heman armancî yê. Kurdî dişmenê DYA yan zî terorîst nîyê.''

Rubinî gemarîya zanayîşanê ke Tirkîya derheqê PKKyî de pêşkêş kerdê vistî vîrî û vat: ''Têkilîya bi Tirkîya ganî newe ra bêra ercnayene. Endamê NATOyî biba zî nêba zî pênaseyê sponsorîya terorî PKKyî ra zêdêr Tirkîya ra şino.''

Rubinî bale ante rolê Temsîlkarê Taybetî yê Trumpî yê Sûrîye James Jeffreyî yê seba îşxalê Girê Sipî û Serêkanîyê ser û bi hawayêkê giranî Jeffrey sûcdar kerd. Rubinî vat: ''Tirkîya herêmê bi nameyê 'herêma biasayîşe' îşxal kerdî û vurnayî herêmanê terorîstan. Jeffreyî têna qirkerdişê etnîkî rê çilaya keske nêtaviste heman wextî de firsend da Erdoganî ke sînoranê Tirkîya bivurno. Xîretê Jeffreyî gureyê Rûsya, Esad û DAÎŞî rê hol bîyî.''

Rubinî bi ziwanêkê tûjî DYA rexne kerd ke rixmê polîtîkayanê xiraban ê Tirkîya kurdî têna verdayî û vat: ''Serekêkê DYA eşkeno nê polîtîkayan bivurno labelê sebebê heqdar ê kurdan estê ke reyna pê vatişanê Amerîka bawer nêbê.''