Sekreterê Têkilîyanê Mîyanneteweyîyan ê Yewîya Sendîkayanê Karkeran a Baskî (LAB) Kaldo Saenz De Benitoyî pêvînayîşê Rayber Apoyî yê bi Omer Ocalanî û mesajê Rayber Apoyî ANFyî rê ercnayî. LAB paştî dano Hemleya 'Rayber Apoyî rê Azadîye, Meseleya Kurdan rê Çareserîye.'

Saenzî vist vîrî ke 43 mengan ra dima Rayber Apoyî de pêvînayîş ameyo kerdene û vat: ''Bêguman ma eşkenê nê pêvînayîşî sey serkewtişêkê Hemleya Azadîye biercnê. Hetê bînî ra seba ke Abdullah Ocalan weş o şarê kurdî moral girewt û dî ke têkoşînê înan bîlasebeb nîyo. Tecrîd armanc keno ke îradeyê tepişteyan bişikno. Xora zîyaretê birazîyê ci Ocalanî şa kerdo û bawerîya ci zêdînaya. Seke ey zî pêvînayîş de vato; Ocalan wazeno ke şîdetî û şerî biqedê û meseleya kurdan bi rayîranê dmeokratîkan çareser biba. No maneno sey prosesê çekverdayîşê ETA.''

Saenzî nîqaşê peyênî yê sîyasetê Tirkîya ercnayî û vat: ''Xora nîqaşê serê meseleya kurdan pozîtîf ê la qîm nêkenê. Ganî terefî seba haştîye komelê mîyanneteweyîyî ra paştî û destek bigêrê. Ganî komelo mîyanneteweyî seba haştîya Krudîstanî mekanîzmayanê sîyasîyan peyda bikero. Eke haştîye bêra Kurdîstanî pêro herême û dinya de zî çîyê holî do bibê. Ganî ma mesajê Abdullah Ocalanî rê paştî bidê û biwazê ke komelo mîyanneteweyî nê firsendî zayî nêkero.''

Saenzî pare kerd ke Hemleya Azadîye zaf girîng a û vat: ''Pêvînayîşê bi Ocalanî netîceya tedaya mîyanneteweyîye de ame kerdene. La no pêvînayîş bi sereyê xo qîm nêkeno. Nê çîyî mojnenê ke azadîya Ocalanî û Kurdîstanî mumkîn a. Seba ameyoxî ganî ma seba azadîya Ocalanî û çareserîya meseleya kurdan teda bikerê ke atmosferê muzakere û dîyalogan bêro viraştene.''