Hemserekê Pêroyî yê HDPyî Mîthat Sancar şi Dêrik û pîya bi heyetê HDPyî  merdimanê kesanê ke qeza de dinyaya xo bedilnaye rê serweşîye waşte. Sancarî dima ra cayo ke tede qeza bi de cipersayîş kerd. Heyetî dima ra eşkerayîye daye.

Sancarî vist vîrî ke 20ê tebaxe de Dîlok û Dêrik de di felaketê cîya cîyayî qewimîyayî û xeylêk hemwelatîyan diyaya xo bedilnaye û vat: ''Çîyo ke Dêrik de qewimîya qeza nê cînayet o. Bajaranê kurdan de rayîrê dormeyî çîn ê. Sebebo tewr pîl ê nê feleketî no yo. Bi serran  o ma wazenê ke wa Dêrik de rayîrê dormeyî bêro viraştene.  Koordînasyonê Resnayîşî yê Şaredarîya Bajarê Pîlî yê Mêrdînî 2020 de kombîyayîşêk de vano ke wa Dêrik de ramitişê wesayîtanê barê giran û tehlukeyin kirişenî mabênê saetanê 7 û 20î de bêro qedexekerdene. La  qeymeqam û mudirê asayîşî yê Dêrikî nê qebul nêkenê. Roja ke qeza qewimîya no rayîr yew şerît bi. Hetê bînî ra nê wesayîtî nînê kontrolkerdene. Badê qewimîyayîşî qedexeyê weşanayîşî  ame îlankerdene. Şima çi nimnenê.

Tîya Tesîsê Etî Bakirî est ê û ma zanê ke yê Cengîz Holdîng ê. Seba ke Etî Bakir rehet çî-mî xo bikerişo Şemrexî ra heta Amedî rayîrê trenî ame viraştene ke. Seba ke ê dahîna zaf qezenc bikerê rayîrê Mêrdîn-Amedî de kuleyê înan est ê. Îhaleyê nê wirt rayîran zî hetê Cengîz Holdîngî ra ameyî girewtene. Asayîşê şarî xemê îqtîdarî de nîyo, o têna derdê ganê xo  û paştgêranê xo de yo. No cînayet eşkera ame. No qeza nîyo. Sebebê nê yew zîhnîyet o. Berpirsîyarê na mesele îqtîdar o. Ma soz danê şarê Dêrikî ma peyê na mesele cameverdê. Ma peyê heqîqetî de yê. Seba ke berbirsîyarî hesabê nê bidê ma do têkoşîn bikerê.''