Hemserekê HDPyî Mîthat Sancar qezaya Turgutluyî ya Manîsa de şarî reyde ame têhet û îfade kerd ke ganî rijîyayîşê gonîye bêro vindartene û muxalefet bi çareserîyan îqtîdarî ra xo cîya bikero.

Hemserekê HDPyî Mîthat Sancarî çarçewa Bernameyê Têkoşînê Demokratîkî de qezaya Turgutluyî ya Manîsa de şarî reyde ame têhet. Wekîlê HDPyî Pero Dundar, Necdet Îpekyuz, Sezaî Temellî, Alîcan Onlu, Serpîle Kemalbay û Kemal Bulbul zî beşdarê kombîyayîşî bîyî.

Hemserekê HDPyî Mîthat Sancarî kombîyayîş de qisey kerd û vat: ''Îqtîdar bi vatişanê zûran îdîa keno ke felaketê laserî de qet sûcê înan, sûcê rant û HESan çin o. No îqtîdar hînî pûç bîyo û nêşermayeno ke bi dînî rantê xo mîyan bikero. Ganî ma rijîyayîşê gonîye vindarnê. Nê welatî de meseleya kurdan esta û şerê 40 serran qewimîyeno. Îqtîdar 5 serran ra nata keno ke na mesele bi polîtîkayanê şer û asayîşî biqedîno. Ma muxalefetî rê persenê; şima do seba çareserîya na mesele çi fikirîyenê? Şima bi kamcîn metodan na mesele çareser bikerê? Ganî muxalefet vera polîtîkaya şerî ya îqtîdarî tewir bigêro. Êyê ke nê îqtîdarî nêwazenê ganî mabênê xo û îqtîdarî de sînorêk xêz bikerê. Ma eşkenê bi dîyalog, sîyaset û muzakereyan meseleya kurdan çareser bikerê. Êyê ke sey ma fikirîyenê ma eşkenê înan reyde îtîfaq zî bikerê. ''