Hemserekê Pêroyî yê HDPyî Mîthat Sancarî kombîyayîşê heftane yê grûba Meclîsî yê partîya xo de rojdem ercna. Sancar bitaybetî, şayîya Newroze, hêrişê vera HDPyî, betalkerdişê Pêkerdişê Îstanbulî û wardayîşê wekîlîya Wekîl Omer Faruk Gergerlîogluyî ser vindert.

Şayîyanê Newroze de şar wayîrê HDPyî vejîya

Sancarî vat: ''Şayîyanê Newroze de şarî reyna waştişê haştîye, azadîye û îradeyê xoverdayîşî fîna çîman ver. Rixmê heme polîtîkayanê hêrişkaran  û tehdîtan şarê ma Newroze de reyna ramojna  dinya ke çew/e nêeşeno pê îrede û anorê ci kay bikero. Newroze de bi mîlyonan kesî wayîrê HDPyî vejîyayî. Êyê ke xeyalê Tirkîyeya bê HDPyî kenê Newroze de cewabê xo girewt. Şar wayîrê vengdayîşê haştîye yo tarîxî yê 2013yî vejîyeno. Ma pê hêzê ke şarê xo ra genê rayîrê xo rê dewam kenê ke ma do rayîrê xo ra peyser amegêrê.

Kurdan rê dişmenîye kenê

Dewaya vera HDPyî dewaya qesasî ya, huqûqî nîya. Vera sîyasetkerdişê kurdan dişmenîye kenê. Wazenê mucadeleyê azadîye yê kurdan bidê vindarnayene. Na dewa xora mehkemeya berze de nê Qesre de ameye amadekerdene.  Sereyê îqetîdarî dozgerê na dewa yo. Ma reyna vanê, ma do şima vindarnê, şima do vîn bikerê. Tersê şima yo pîl esto, ma de zî cesareto pîl esto. Ma do şima rê bidê vînkerdene û welatî rê bidê qezenckerdene. Dadagerê wayîrê wîjdanî yê Mehkemeya Qanûnê Bingeyî ganî rixmê zextê îqtîdarî nê îdîaneyî red bikerê.

Vengê Gergerlîogluyî bêwîjdanî tersnayî

Seba ke embazê ma Omer Faruk Gergerlîoglu bi vengo pîl wekîlîya ci ameye xespkerdene. Seba ke no veng resa wîjdanan, merdimê wayîrê wîjdanî ardî têhet, bêwîjdanî tersayî. Gergerlîogluyî rî dame na ro. Seba ke embazê ma ke xora hûmara înan zî tay a semedê Newroze herêman ra vila bîyî  bi seyan polîsî kewtî bîna û gama ke Gergerlîoglu semedê nimajê sibayî destmaj geno  o desbend kerd.

Îqtîdaro derbekar do vîn bikero

Tersê îqtîdarî yo tewr pîl mucadeleyê cinîyan o. Coka înan Pêkerdişê Îstanbulî betal kerd la ê xo zî zanê ke no mucadele do nêvindo û peynî ra tewr peynî îqtîdarî rê bido vînîkerdene. Ma bîlasebeb nêvanê îqtîdar derbekar o. Pêkerdiş pê Qerarnameyê Serekkomarîye ame betalkerdene. Ma do vîjnayîşê verênî de nê îqtîdarî bibedilnê. Wa nayî rê şikê kesî/e çînêbo.''