Hemşaredaranê HDPyî seba ercnayîşê hêrişanê vera HDPyî înternetî ser o kombîyayîşêk kerd. Destpêkê kombîyayîşî de Hemserekanê Pêroyîyan ê HDPyî Pervîne Buldan û Mîthat Sancarî qisey kerd. 

Buldane îfade kerd ke 8ê Adare û Newroze mesajê girîngî dayî hukmatî rê. Buldane bale ante grevê vêşanîye yê tepişteyan ser û vat: ''Ganî cade waştişê tepişteyan bêrê caardene.  Tirkîya goreyê qanûnanê xo tênêgêrena. Mesele tecrîdê Îmraliyî, neheqeyîya vera kurdan, binpaykerdişê heqanê merdiman o.''

Buldane dewaya qefilnayîşê HDPyî viste vîrî û pare kerd ke ganî dewêka winasêne hînî nêkewe rojdemê Tirkîya. Buldane vat: ''Ma amadekarîya xo, planê xo yê A, B, Cyî amade kerdbi. Ma komîsyonêkê xurtî yê huqûqî awan kenê. Bêguman seba teşhîrkerdişê qeyûman zî erk û mesuldarîyêka pîle kewena milê ma.''

Mîthat Sancarî vat: ''Proseso nikayêne 'rayraşîyayîşê planê verî' yo. Kurdî pêro dinya de bi taybetî Rojawan de hînî aktorê girîng ê. Polîtîkaya Tirkîya ya vera kurdan tesîrê pêro kurdan kena. Nika planêko pîl ê tasfîyekerdişî esto. Tek rayîrê çinkerdişê plananê tasfîye yê îqtîdar û dewlete, têkoşînêko xurt û xeta sîyasî ya qerardar a. Eke ma naye bikerê ma do dewaya qefilnayîşî zî pûç bikerê.''