Denîze Poyraz 17ê hezîrana 2021î de bînaya HDPyî ya Îzmîrî de hetê Onur Gencerî ra amebî qetilkerdene. Roniştişo diyîn ê dewa ewro Mehkemeya Cezaya Girane ya Îzmîr de yeno kerdene.

Hemserekê HDPyî Mîthat Sancar, endamê Meclîsê Cinîyan, Meclîsê Partîye û Heyetê Rayberdişê Merkezî yê HDPyî, hemserekî, wekîlî zî tede xeylêk huqûqnas û rêxistinê cinîyan zî dewa teqîb kenê.

Sancarî roniştişî ra verî qisey kerd û pare kerd ke qirkerdişê Denîze Poyraz de HDP amebi hedefkerdene û vat: ''La pê qetilkerdişê embazanê ma têkoşînê ma do nêqedo. Ê wazenê ma bitersnê la pê hêrişanê winasênan do nêeşkê ser bikewê. Ma seba edalet, raştîye û haştîye tîya de yê. Ma do seba edaletî têkoşînê xo berz bikerê.

Nê sîstem, îqtîdar û talanî ra tek rayîrê felatî pîya têkoşînkerdiş o. Dezgehê muhakemekerdişî destê îqtîdarî de yo û seba îqtîdar o seba tengkerdişê muxalefet û hêzanê demokrasî şuxilneno. Eke ma bêveng bimanê edalet do salonanê mehkeme de nêro caardene. Ma bêveng nêmanê; vera bêedaletî ma têkoşînê xo rêxistin bikerê, vera xirabîye paştdayîş û têkoşînê hemparî awan bikerê.''