Vervatoxa Meclîsê Cinîyan ê DBPyî Aynure Sarica kombîyayîşêkê çapemenîye kerd û rojdem ercna. 

Sarica qiseykerdişê xo de nê babetan ser de vinderte:

''Tecrîdê Îmraliyî her ke şino beno giranêr. Pê tecrîdî yeno armanckerdene ke fikrê Birêz Ocalanî vila nêbê. La heta ke Birêz Ocalan azad bibo têkoşînê ma do dewam bikero û pîl bibo. Tecrîd sûcê vera merdimatîye yo. No tecrîd hînî vilayê pêro zîndanan bîyo. Cinîyê tepişteyî Zîndanê Patnosî yê Agirî de raştê îşkenceyê gireyê xozî ameyî. Cinîyî do vera tecrîdî û îşkenceyî tim têkoşîn bikerê.

Qetilkerdişê Jîna Emînî û Şorişê Jin, Jiyan, Azadî serrêke xo pey de verdaye. Îranî yadkerdişê Jîna de keyeyê Jîna zî tede xeylêk kesî destbend kerdî. Yeno waştene ke cinîyî bêrê astengkerdene la cinîyan qetî nê astengîyî nêşinasnayî.

PDK xeta îxanetî de şino û hemkarîya dewleta tirke keno. Ma hewteyêk o vera PDKyî çalakîyan kenê la polîsan nê çalakîyan de hêrişê şarî kerd. Vera yewîya kurdan Barzanîyî têgêrenê. Ma sey cinîyan heta peynî seba caardişê yewîya kurdan bixebitê. Ma do nêverdê ke destkewteyê ma bêrê çinkerdene.

Vera cinîyan ê kurdan polîtîkayê şerê taybetî dewam kenê. Gever de kesanê ke Esraya 13 serre rê tecawuz kerdbî ê vera dîyayî la Esra xo kişt. Mêrdîn de zî 3 qoricîyan cinîyêke rê tecawuz kerde la nê qoricîyî zî vera dîyayî. Dewlete camêrdan pawena. 

Ma venga pêro cinîyan danê ke tewrê Kampanyaya 'Jin Jiyan Azadî reyde ver bi azadîye' ya TJA bibê. Ma sere de cinîyan venga pêro kesan danê ke 22yê êlule de tewrê roniştişê dewaya vera Ayşe Gokkan û 28ê êlule de zî tewrê roniştişê dewaya vera Rojbîne Sevîl Çetîn bibê.''