Buroyê Huqûqî yê Asrinî seba Rayberê Şarê Kurdî Abdullah Ocalanî û tepişteyanê bînan ê Zîndanê Îmraliyî Omer Hayrî Konar, Hamîlî Yildirim û Veysî Aktaşî muracatê Mehkemeya Qanûnê Bingeyî (AYM) kerd.

Goreyê xebera Ajansê Mezopotamya (MA) avûkatan 24ê kanûne de bi waştişê 'tedbîran' muracat kerd û bale ante ser ke tewr peyên 25ê adare de pê rayîrê telefonî Abdullah Ocalanî de têkilîye ameye viraştene. Avûkatan muracatê xo de vat:

''Nê tarîxî ra dima nê 9 mengan de ma muwekîlê xo ra xeberêke nêgirewte. Destûr nêdîya ke pê rayîranê sey mektube û telefonî ma muwekîlanê xo de temas bikerê. Coka Hakîmîya Înfazî rê muracat amebi kerdene. Hakîmîya Înfazî îfade kerd ke derheqê pêvînayîşê keyeyan de cezaya dîsîplînî, derheqê pêvînayîşê avûkatan de zî cezaya qedexeyê pêvînayîşî yê bi 6 aşman estê. Na biraya vera huqûqî rê îtîraz ame kerdene û dosyayê nê cezayan ameyî waştene. La bi bahaneya asayîşî nê waştişî ameyî redkerdene.

25ê adara 2021î ra nata muwekîlanê ma ra xebere nêna girewtene, cuyê înan binê rîskî de yê. Muwekîlê ma serre ra pîlêr ê, rewşa înan a weşîye hol nîyan û wextêkê dergî ra nata maruzê îzolasyon û tecrîdî manenê. Nê zî weşîya psîkolojî û bedenê înan tehdît kenê. Seba ke mekanîzmaya kontrolî û rayîrê bitesîrî yê muracatî çin ê rîskî benê pîlêr. Seba ke zeraro ke binpaykerdişê madeya 17.  (qedexeyê îşkenceyî) dayo biqedo û keye û avûkatî bieşkê pêvînayîş bikerê ma wazenê goreyê madeya 73. ya tuzukê zereyî bire bêra dayene.''