Grevê vêşanîye yê tepişteyan ê vera tecrîdê Îmraliyî û binpaykerdişanê heqanê xo 85 rojî peyê xo de verdayî. 3ê sibate de tepişteyê Zîndanê Şakranî Mahmut Yildiz wexto ke grevê vêşanîye de bi 14ê sibate de çalakîyêka fedayî kerde û dinyaya xo bedilnaye. Prosesê grevî de tepişteyî zî tim maruzê tehqîqat û cezaya dîsîplînî benê.

Hemvervatoxa Komîsyonê Zîndanan ê OHDyî Destîna Yildiz derheqê mesele de ANFyî rê qisey kerd.

Yildize vist vîrî ke tepişteyî kome bi kome 5 rojan grevê vêşanîye kenê û vat:'' Xora grev hetê weşîye ra zî zaf tesîrê tepişteyan keno. Tepişteyî wazenê tecrîdê vera Birêz Abdullah Ocalanî bêro wedaritene. Tepişteyî seba ke dewlete goreyê qanûnanê xo têbigêra na çalakîye kenê.''

Yildize îfade kerd ke zîndanan de tecrîdêko giran esto û vat: ''Pandemî de binpaykerdişê heqan asta tewr berze de zêdîyayî. Pê bahaneya pandemî destûr nêdîyeno ke tepişteyî yewbînan bivînê, 14 rojan tepişteyan rê karantîna yena kerdene. Ne kitab ne zî kovarî dîyenê tepişteyan. Mektubê înan zî nêdîyenê. Nê pêro kerdişê tecrîdî yê. Rixmo ko heman çalakî ya îdareyê zîndanî seba her roja grevê vêşanîye tehqîqatêkê bînî akenê, cezaya dîsîplînî dîyena. Nê zî mojnenê ke îdareyî pê keyfê xo têgêrenê.''