Vizêr roniştişê dewaya Denîze Poyraza ke 17ê hezirane de banê HDPyî yê Îzmîrî de hetê kiştox Onur Gencerî ra ameye qetilkerdene, Mehkemeya Cezaya Girane ya 6. ya Îzmîrî de ame kerdene.

Serdozgerîya Komare ya Îzmîrî seba ke Hemsereka Pêroyî ya HDPyî Pervîne Buldan mehkeme de qisey kerd, derheqê ci de cipersayîş da destpêkerdene. Eşkerayîya dozgerîye de ame îdîakerdene ke Buldane heyetê mehkeme rê heqeret kerdo. Reyna derheqê înanê ke bêdestur mehkeme de dîmenî antî de zî cipersayîş dîya destpêkerdene.

Seba ke heyetê mehkeme wextê tespîtkerdişê nasnameyî de zaf nerm nêzdîyê kiştox Gencerî bi Pervîne Buldan nêrazîbîyayîş mojna û wina vat: ''No mêrik Minbiç de ame perwerdekerdene û o yew kiştox o. DAÎŞij o. Şima nêeşkenê wina nerm nêzdîye ê bibê. Şima ganî sey kiştoxî ci rê nêzdî bibê.''