Seba Şaredarîya Îstanbulî namzedê DEM Partî Merale Daniş Beştaş û Murat Çepnî yê. Kampanyayê weçînayîşan zî hinî qedîyenê. Îstanbul de weçînitox û zerrîwazê DEM Partî hem namzedanê xo ra hem zî xebatanê weçînayîşan ra razî yê.

Weçînitoxanê Îstanbulî ma rê qalê hîsanê xo kerd. La tedayanê sîyasîyan ra ma do nameyê înan eşkera nêkerê.

Mehmeto ke wextêkî ra nata Îstanbul de ciwîyeno pare kerd ke seba ke bi pêkerdişî namzedî ameyê dîyarkerdene ê qayîl ê û vat: ''Mi destek da ke nê weçînayîşan de partîya ma namzedanê xo veja. Nika waran de ma zî destek danê înan. Seba ke partî xo resna şarî hol bîye ke namzedî vetî. Seba ke namzedê ma mîyanê ma de yê ma bimoral ê.''

Firato ke Îstanbul de mamostatîye keno vat: ''Goreyê mi raşt o ke partîya ma namzedê xo vetî. Îstanbul de reqabetêko cidî est o. Seba ke estbîyayîşê xo mojnayo rind bîyo ke partîya ma namzedê xo eşkera kerdê. Ê ma nêhesibnenê la hêzê ma niqaş kenê. Girîng o ke ma nika têkoşînê xo bi namzedanê xo û şarê xo kenê.''

Resulo ke weçînitoxê DEM Partî yo vat: ''Destpêkî ra mi waştêne ke wa partîya ma namzedanê xo bimojna. Nika rewşa ma hol a. Îhtîmal o ke ma se ra 10 ra zêdeyêr rayan bigêrê û no seba AKP û CHPyî zî do bibo mesajêk.''

Sema îfade kerd ke a kêfweş a ke DEM Partî namzedê xo vetê û vat: ''2019 de ma paştî dabî bira partîye la ma rewşe ra razî nêbîyî. Nika motivasyonê ma berz o. Tîya de meseleya esase serkewtiş nîya; îdîaya partîya ma ya.''

Kivanço ke sendîkayêke de wezîfedar o vat: ''Ez kêfweş a ke Merale Daniş Beştaş bîya namzed. Çunke tecrubeyê aye zaf ê. Murat Çepnî zî namzedêko bihêz o. La ganî namzedî hîna rew biameyêne dîyarkerdene. Ancî zî prosesê weçînayîşan seba ma rind vîyareno.''