Fatma Bostan Unsal vengdayîşê ‘Haştîye û Komelê Demokratîkî’ yê Rayber Apoyî ercna û vat ke akerdişê kanalanê sîyasetê demokratîkî û caardişê azadîya fikran seba averşîyayîşê prosesî şertê bingeyî yê.
Zanyara sîyasetî û pawitoxa heqanê merdiman Fatma Bostan Unsal vengdayîşê ‘Haştîye û Komelê Demokratîkî’ yê Rayber Apoyî û prosesî ANFyî rê ercnayî.
Fatma Bostan Unsal ard ziwan ke hinî meseleya muxatabbîyayîşê Rayber Apoyî babeta nîqaşî nîya û no ameyo qebulkerdene. Fatma pare kerd ke bihêzbîyayîşê PKKyî astengîyanê verê sîyasetê demokratîkî wedarneno.
Fatma vat: ‘’Ganî dewlete kanalanê sîyasetê demoktatîkî abikera. Seke vengdayîş de bi zelalî ameyo vatene ganî cepheyê dewlete-hukmatî kanalanê sîyasetê demokratîkî abikero û azadîya fikran bîyaro ca.
Serkewtişê nê prosesî yo tewr pîl peydakerdişê platformêkê hîna hîrayî yo. No proses tayînê qeyûman, tepişîyayîşê sîyasetmedaranê kurdan û dewayê vera kurdan sînordar bikero û verê xebatanê perwerde û kulturê kurdan abikero.’’
Fatma Bostan Unsal dîyar kerd ke seba ke proses aver şoro ganî qanûnê ke azadîya fikran binpay kenê bêrê wedaritene û vat: ‘’Ganî penaseyê terorî newe ra bêro kerdene. Ganî çapemenîye prosesanê haştîye de rolêkê girîngî kay bikera.’’
