Aytene Ozturk Anqara de merkezê îşkenceyan ê nimiteyî de 6 mengan îşkence dî. Aytene dima kitabê xo “Faşizmin Gizli İşkencehanelerinde Direniş ve Zafer” de qala nê îşkenceyan kerde. La vera Aytene Ozturk kitabê ci ra bi îdîaya 'propagandaya rêxistine' dewa ameye akerdene.

Aytene Ozturka ke 2 serrî yo hepsê keyeyî de ya, ANFyî rê qala dewa kerde.

Aytene Ozturk ard ziwan ke aye îşkence dîyo la vera îşkencekeran ney vera aye dewa ameya akerdene. Aytene vat: ''Kitab de mi qala îşkenceyan kerde. No senî beno propagandaya rêxistine? Seba ke mi kitab de qala şîîra Mahîr Çayanî, deyîrê Grup Yorumî, way û birayan û najê xo kerda ez pê propagandaya rêxistine yena muhakemekerdene. Kekê mi 1994 de amebi înfazkerdene, waka mi rojeyê mergî de dinyaya xo bedilnabî û naja mi zî Qirkerdişê 19ê Kanûne de amebî qetilkerdene. Seba ke mi nînan rê vato 'şehîd' mi rê ceza yena waştene.''

Aytene Ozturk bale ante ser ke delîlê îşkenceyanê verê ci qetî nêameyî qebulkerdene û îşkenceyê vera aye zî nêameyî cezakerdene. Aytene vat: ''Mehkemeyî bi nê hawayî vanê ke îşkenceyî do dewam bikerê. Yanî yeno waltene ke wa çimê ma bitersê û zulm dewam bikero. Serebûtêkê lînçkerdişî ra 2 serrî yo ez hepsê keyeyî de ya. Ez erdlerz de zî nêeşkaye şora hetê keyeyê xo Hatayî. Rixmê her çî zî ez do qetî bêveng nêmana. Ganî her kes vera îşkenceyan vengê xo berz bikero. Ez nêwazena ke hînî çew îşkence bivîno. Coka ez do heta peynî têkoşîn bikera.''