Seba ke tepişteyo nêweş Devrîm Ayiko ke Zîndanê Eskîşehîr de tepişîyeno, û pêro tepişteyê nêweşî bêrê veradayene kampanyaya îmzayan dîyaye destpêkerdene.

Dadîya Devrîm Ayiko ke nêweşê crohnî yo, Hulya Ayik seba ke bale biancê rewşa lajê xo change.org ser o kampanyaya îmzayan a bi serrnameyê 'Seba nêweşê crohnî Devrîm Ayikî azadîye' daye destpêkerdene. 

Hulya Ayik derheqê rewşa lajê xo de agahîyî dayî û vat: ''Verî ke rewşa lajê mi biba xirabêr ez selahîyetdaran ra wazena ke wa ey vera bidê. Çunke eke tedawîya ci nika dest pênêkera bedenê ci de texrîbatê pîlî do virazîyê. Ez venga selahîyetdaran dana ke wa edalet bîyarê ca. Şermê nê welatî yo ke Devrîm û sey ey tepişteyê nêweşî zîndanan de manenê.''

Dima ke kampanya dest pêkerde bi seyan kesî îmza daye ci. Kampanya twitter de zî bi hashtagê #HastaTutukluDevrimAyikaOzgurluk (Seba nêweşê crohnî Devrîm Ayikî azadîye) vilakerdişî ameyî kerdene.