Menga gulane de heqê destnêdayîşê wekilîye yê Wekîlê Partîya Komaleya Îslamî ya Kurdîstanî Soran Omerî wedarîya. 12ê temmuza 2020î de zî mehkemeya Hewlêrî bire daye ke Soran Omer bêro destbendkerdene. 

Wekîl Soran Omerî derheqê babetê wedaritişê heqê destnêdayîşî de û derheqê dokumentanê Mesrûr Barzanîyî de 5ê gulana 2020î de Silêmanî de eşkerayîyêka çapemenîye dabi.

Omerî vatbi: ''Şewa 1ê adare mi Mesrûr Barzanîyî de qisey kerd. 2ê adare de mehkemeya Hewlêrî derheqê mi de dewa kerd a. Heman wextî de mehkemeya cigêrayîşî waşt ke heqê destnêdayîşî yê wekilîya mi bêro wedaritene. Mi ewro derheqê mesele de dokumentî  serekîya parlamento rê teslîm kerdî. La serekîye dokumentî nêgirewtî û waşt ke ez nînan bişawa mehkemeya pêroyîye.''

Soranî pê dokumentan derheqê Serekwezîrê Herêma Kurdîstanî Mesrûr Barzanîyî de zî nê çîyî vatî: ''Goreyê dokumentanê Wikiliksî Mesrûr Barzanî wayîrê barêkê pîlî yê Koma Stêrî yo. Koma Stêr 12 şîrket û bankayan ra yena meydan. Nameyê banka zî Bank Arti ya û pereyê Herêma Kurdîstanî dolarî ra açarnena dînar.''

Endamê Heyetê Rayberdişî yê Têgêrayîşê Azadîye Ebubekîr Mecîdî zî Rojnewsî reyde qisey kerd û da zanayene ke wedaritişê heqê destnêdayîşî yê wekilîya Soran Omerî seba her kesî zulmêko pîl bi.

Mecîdî vat: ''Eşkera yo ke na parlamento yê şarî nê yê îqtîdar û dewletan a. Tesîrê dewleta tirke parlamento ser o esto. Birê winasênî birê dewleta tirke yê. ''