Paştdayîşê mîyanneteweyî yê kampanyaya vera qedexeyê PKKyî çend şino zêdîyeno.  Avûkato alman Avukat Roland Meister,Vervatoxê Mîyanneteweyî yê Partîya Komînîste ya Fransa Cyril Beniot û Vervatoxê  Die Linke yê Herêma Ahlenî Lukas Eitelî Medya Haberî ra Erem Kansoyî rê qisey kerd.

Wa PKK lîsteya terorî ra bêro vetene

Avûkato alman Roland Meisterî vist vîrî ke badê qedexeyê vera PKKyî 1993yî de bi hezaran kurdî raştê zextan ameyî, îltîcayê înan red bîyî û zafê înan teslîmê dewleta tirke ya îşkencekare bîyî û vat: ''28 serrî yo nê caardişî hema dewam kenê. Şarê kurdî têkoşînê azadîye keno. PKK vera çeteyanê DAÎŞî têkoşîn keno la Ewropa de lîsteya terorî de ca geno. Coka çew mana nê nêdano. Mehkemeya Belçîka qerar girewt ke PKK rêxitina terorî nîya. No qerarêko zaf raşt o. PKK têkoşînê azadîye yo. Tecrîdê serê Rayberê Şarê Kurdî Abdullah Ocalanî û qedexeyê vera PKKyî pabesteyê yewbînan ê. Seba ke Ewropa û Rojhilatê Mîyanênî gamêke aver şirê ganî PKK lîsteya terorî ra bêro vetene û Abdullah Ocalan serbest bêro veradayene.''

Ganî ma hukmatanê Ewropa rê game bidê eştene

Vervatoxê  Die Linke yê Herêma Ahlenî Lukas Eitelî zî vat: ''Tirkîya çareserî nêwazena û netîceya hemkarîya stratejîke ya Almanya û Tirkîya de PKK Almanya de ame qedexekerdene. Xora Almanya tim vera têgêrayîşanê azadîye ya. Ganî paştdayîşê semedê kurdan bêro pîlkerdene. Eke şarê Ewropa bibê yew û paştî bidê kurdan hukmatî zî mecbur mananê ke cewab bidê. Ma şinê hukmatanê xo ser ke wa qedexeyê PKKyî wedarî. Beno ke ma hema ser nêkewtî la averşîyayîş zî esto. Bi serran o bazirganîya çekan a bi Tirkîya ra mîlyonî qezenc kerdî. Hukmatê Almanya bi qedexeyê PKKyî qezenco pîl fîneno dest. Sebebo tewr pîl ê qedexeyê vera PKKyî bazirganîya çekan a. Serkewtişê na kampanya zaf muhîm o. Ganî şarî û hetê demokratî hêzê xo bikerê yew, wayîrê têkoşînê azadîye yê kurdan vejîyê ke hukmatanê Ewropa rê game bidê eştene.''

Têna PKK vera terorîstan şer keno

Vervatoxê Mîyanneteweyî yê Partîya Komînîste ya Fransa Cyril Beniot zî vat: ''Eke PKK lîsteya terorî bêro vetene verê haştîye û demokrasîyî bêno a. PKK vera DAÎŞo ke dinya rê bîyo bela şer keno. Rixmê naye yeno qedexekerdene. Aqilê merdimî/e naye nêgeno. 3 cinîyê aktîvîstê kurdî nizdê des serran verî Fransa de ameyî qetilkerdene. No qirkerdiş hema zî nêame zelalkerdene. Fransa Erdogan û polîtîkayanê Tirkîya pawena. Ma zanê terorîzm çî yo û eleqeya PKKyî bi ci çîn o. Ma Paris û xeylêk paytextan de terosîtê raştkînî dîyî. Ciwanê kurdan vera nê terosîtan ma pawenê. Eslê xo de raştî naya ke têna PKK vera terorîstan şer keno. Welatê Ewropa zî zanê ke PKK terorîst nîyo la goreyê karanê xo lîste de tepişenê. Seba ke PKK lîsteya terorî de yo şarê Ewropa tira dûrî vindeno. Ganî na xeletîye ra bêro agêrayene. Ganî rinda bêro famkerdene ke PKK rêxistina têrorî nê têgêrayîşê azadîye yo. Semedê heqanê  merdiman semedê şarê sîvîlî têkoşîn keno. Ganî ma hukmatanê xo kerdişanê ci rê bîyarê têrî. Eke sey teror vînenî qey înan çend serî verê cu vera DAÎŞî paştî dayêne PKKyî. Sey Partîya Komînîste ya Fransa tewirê ma zelal o. Ma paştî danê na kampanya.''