Komeleya Heqanê Merdiman (ÎHD) bi wesîleya serrgêra 36. ya Qirkerdişê Helebçe Amed de Konferanê Haştîye û Çareserkerdişê Meseleya Kurdan kerd. Sîyasetmedar, roşnvîr, nuştox, rojnamegerî, temsîlkarê rêxistina komelê sîvîlî û pawitoxê heqanê merdiman tewrê konfransê di rojan bîyî. Konferans de ame vengdayene ke wa meseleya kurdan bi rayîrê demokratîkî bêro çareserkerdene û tecrîdê serê Rayberê Şarê Kurdî Abdullah Ocalanî bêro wedaritene.

Temsîlkarê partîyanê sîyasîyan û rêxistiananê komelê sîvîlî yê ke tewrê konferansî bîyî derheqê babete de ANFyî rê qisey kerd.

Serekê ÎHDyî yê Amedî Ercan Yilmazî vat: ''Ma hedef kenê ke meseleya kurdan a ke seserrî yo nêameya çarserkerdene, rayîrê demokratîkî ra çareser bikerê.  Semedê nê sey komele zaf xebatê ma est ê. Waştişê ma yo hempar çarserkerdişê meseleya kurdan o. Na rewşe têna bi Tirkîya sînordar nîya. Meseleya kurdan hinî bîya meseleya mîyanneteweyîye. Heme leteyanê Kurdîstanî de heqê esasî yê kurdan yenê binpaykerdene. Seba ke ma verê nê bigêrê  û çare biafirnê ma muneqeşe kenê.''

Wekîlê DEM Partî Cengîz Çandarî zî meseleya kurdan sey meseleya tewr pîle ya Tirkîya name kerd û nê vatî: ''Seba ke meseleya kurdan çareser nêbîya, netîceyê girdî vejîyenê meydan. Çi heyf ke heta ewro gamê ke hewce kenê nêameyî eştene.  Meseleya tecrîdî qetî pabesteyê meseleya kurdan a. Heta ke tecrîd bibo mesele nîna çareserkerdene. Coka ganî tecrîd bêro wedaritene ke mesele bêro çareserkerdene.  Na babete de partîya ma 'Rayrşîyayîşê Azadîye yê Pîlî' û xeylêk kampanyayê bînî kerdî. Badê weçînayîşanê 31ê adare ma do na babete dahîna zaf bîyarê rojdemî.''

Temsîlkarê Waqfa Heqanê Merdiman a Tirkîya yê Amedî Murat Abayî zî vat: ''Waştişê ma yo ke wa hînî gonî mero rişnayene. Meseleya kurdan de mecbur  rew ya zî erey do haştîyêke bibo. Kurdî heqê xo wazenê û nê ganî bi dîyalogî bêrê caardene. Çi heyf ke ma vînenî hukmatê Tirkîya ver Rojawanî operasyonanê xo zêdîneno. Rayîrê haştîye zehmet o la teberê haştîye de yewna alternatîfê ma çîn o. Wa hînî gonî merişîyo. Ma tîya ra kenê ke vengê haştîye dahîna hêzdar vejê. Çunke ma pêro hewceyê haştîye yê.''

Nuştox Celalettîn Canî zî ard ziwan ke tecrîd û meseleya kurdan pabesteyê yewbînanê û vat:  ''Prosesê haştîye yo verên hetê Birêz Ocalanî ra ame rojdemekerdene û rayraberdene.  Her babete rê hakîm bi û tespîtê zanayeyî kerdêne. O wext çi heyf ke waştişê Birêz Ocalanî nêameyî kerdene û xetayî ameyî kerdene. Ez şahîd a, hukmat çareserî rê bi asteng. Seba ke Birêz Ocalan muxatab  bi û heqê mesele ra ameyêne, keyfê hukmatî nê de nêame.  Eke proseso bîn ê haştîye bêro destpêkerdene muxatabo tewr gird Birêz Abdullah Ocalan o.''