Goreyê xebera Ajansê Mezopotamya (MA) Buroyê Huqûqî yê Asrinî seba Rayberê Şarê Kurdî Abdullah Ocalanî û tepişteyanê bînan ê Zîndanê Îmraliyî Omer Hayrî Konar, Hamîlî Yildirim û Veysî Aktaşî  3ê sibate de vengda Raportorê Taybetî yê Îşkenceyî yê Neteweyanê Yewbîyayan ke wa lezabez pêvînayîş bêro kerdene.

Wekîlan vist vîrî ke ê 25ê adere ra nata muwekîlanê xo ra xebere nêgenê û muracatê înan ê xebergirwtişê ke nê prosesî de bênetîce mendî înan ra kerdî rêz. Reyna pêvînîyanê CPTyî yê Îmraliyî yê verênî zî ameyî vîrvistene. Avûkatan waşt wa ê cade semedê pêvînayîşê Îmraliyî çîyêk bikerê.

Avûkatan tewr peynî 8 serran da dima 2-22ê gulane, 12-18ê hezîrane û 7ê tebaxa 2019î de muwekîlê xo reyde pêvînayîş kerdbi. Cewab nêdîyeno muracatê pêvînayîşan. Avûkatanê 22ê teşrîna peyênê de seba ke cade muwekîlanê xo reyde pêvînayîş bikerê muracatê Dadgerîya Înfazî ya Bursa kerd. Muracatê avûkatan ame redkerdene û ame vatene ke derheqê Abdullah Ocalanî de di qerarê qedexeyê pêvînayîşî estê. Dadgerîya Înfazî ya Bursa vat 12ê teşrîna verêne de cezaya dîsîplînî ya 6 mengan dîyaya Abdullah Ocalanî coka nêeşkeno pêvînayîş bikero. Dadgerîye cewabê muracatê keyeyî de zî vat Serekîya Heyetê Dîsîplînî ya Mudirîya Dezgehê Ceza Înfazî yê Îmraliyî 18ê tebaxe de cezaya pêvînayîşê merdiman a 3 mengan daya. Dadgerîye vat seba ke cezaya qedexeyê pêvînayîşî yê 6 mengan seba avûkatan û 3 mengan zî seba merdimanê tepişteyan esta ê muracatê pêvînayîşî red kenê.