Tepişteyanê Îmraliyî ra Rayberê Şarê Kurdî Abdullah Ocalan, Hamîlî Yildirim, Omer Hayrî Konar û Veysî Aktaşî ra 39 mengî yo xeberêke nêna girewtene. Muracatê pêvînayîşî yê keye û avûkatan bi bahaneya 'cezayanê dîsîplînî' yenê astengkerdene.

KeyeYê Aktaşî tewr peynî de 3ê adara 2020î de Îmrali de lajê xo reyde pêvînayîş kerd. 27ê nîsane de rîyê janî ra rayêke telefonî de qisey kerd.O tarîxî ra nate  keyeyî Aktaşîra qet xeberêkê nêgirewtê.

Aktaşî 28ê nîsane de cezaya xo ya 30 serran kerde temam la telîyeya ci bi qerarê Heyetê Çimdarî û Îdareyî serrêke ameye peydeeştene. Avûkatanê Buroyê Huqûqî yê Asrinî vera nê muracatê Dadgerîya Înfazî ya 3ine ya Bursa kerd û la no muracat 2ê gulane de ame redkerdene. Avûkatan vera nê qerarî muracatê Mehkemeya Cezaya Girane ya 1ine ya Bursa kerd la no muracat zî ame redkerdene.

Seba ke tehlîye ame peydetene û 39 mengî yo xebere nîna girewtene wayê Aktaşî Sabîha Aslan û Melîha Çetîn, avûkatî Mazlûm Dînç û Suzane Akipa muracatê şubeyanê OHD û ÎHD yê Amedî kerd û paştdayîşo huqûqî waşt.

Sabîha Aslana ke bi nameyê keyeyê xo qisey kerd pêvînayîşan de nê vatî: ''Ma 9 serran de têna 3 rey pêvînayîş kerd ke çîyo wînayên nîno qebulkerdene. Babîyê merd, erdlerzê bi 6ê sibate bi la rixmê ne ma nêeşekayî birayê mi reyde pêvînayîş bikerê. Nika ganî o biameyêne tehlîyekerdene. Ganî na neheqîye nêbîyênî. No zulm o.''

 Îdarekaranê OHD  û ÎHDyî zî vat ê do vera bêhuqûqîya Îmraliyî bêveng memanê û çîyo ke destê înan ra bêro bikerê.