Bajarê Mainzî yê Almanya de 8ê gulane de Semedê rojnameyê Yenî Ozgur Polîtîka yo ke Ewropa de sey temsîlkarê tradîsyonê çapemenîya azade gureyeno, şewa paştdayîşî ameye organîzekerdene.

Heyeta Vêveyî ya Eleganzî ke tede aktîvîte ame kerdene, pê fotografanê şehîdanê çapemenîya azade ameye xemilnayene û pankartê ''Qelemê înan do erdî de memanê'' û ''Raştîyî do tarî de memanê'' ameyî daliqnayene.

Berpirsîyaranê rojnameyî ra Roger Turautî ke qiseykerdişê akerdişî kerd vist vîrî ke seba ke raştîyê tarî de memanê zaf bedelê pîlî ameyî dayene û vat ê do pîya bi paştdayîşê şarê xo têkoşînê şehîdanê çapemenîya azade bidê domnayene.

Nuştoxanê rojnameyî ra Ferda Çetînî zî qiseykerdişê xo de nê vatî: ''Nika Kurdîstan de şer est o.  Zerrîya ma înan reyde ya. Ma pê têkoşînê şehîdanê xo heta ewro ameyî.Têkoşînê ma yê estbîyayîşî û estbîyayîşê xo bidê qebulkerdişî dewam keno. Her kes qala îşxalê Rûsya û macîranê Ukrayna keno la vera hêrşê îşxalî yê dewleta tirke yê vera Kurdîstanî vengê çewî nêvejîyeno. Wayîrê hera Başûrê Kurdîstan û Şingalî kurd ê. Îşxal û îxanet bîyî yew. PDK û keyeyê Barzanî eşkera paştî danê îşxalê Tirkîya. Ganî ma pêro vera nê berpirsîyarîya xo bîyarê ca û têkoşînê xo pîlêr bikerê.''

Hemşeradara Bajarê Pîlî yê Wanî Bedîa Ozgokçe ya ke wezîfeyê ci ame xestperkdene a zî mîyanê qiseykerdoxan de bî. Ozgokçe bi wesîleya Roja Dayîkan şexsê Dayîka Taybete de roja heme dayîkan bimbarek kerde. Ozgukçe bale ante muhîmîya çapemenîya azade ser û kedkarê çapemenîya azade ke rêçê heqîqetî de şinê selam kerdî.

Hunermendî  Farqin Azad, Eléonore Fourniau, Pervin Çakar û Mehmet Atli zî bi deyîranê xo reng da şewe. Aktîvîte pê goştarîya muzîkî û govende qedîyaye.