Tepişte Garîbe Gezera ke Zîndanê Bunyanî ra sewqê Zîndanê Kandira bibî  maruzê îşkence û îstîsmarê cînsîyî yê gardîyanan menda. Dadîya Garîbe Gezer Halîme da zanayene ke kênaya ci rê cezaya muebede ya girane dîyaye û derheqê rewşa aye de Jinnewsî rê qisey kerd. 

Dayîke Halîme vat Garîbe 3ê adara 2016î de tepişîyaye û Zîndananê Mîdyadî, Kutahya, Şakranî, Tarsûs û Bunyanî rê erşawîyaye. Dayîke Halîme wina vat: “Tewr peyîn kênaya mi surgunê Kandira ameye kerdene.  6 serrî yo zîndan de ya surgunê 8 zîndanan bîya. Cezaya muebede ya girane dîyaye ci û 22 dewaya îstîmlakî ceza ci rê ameya dayene. Nika 180 hezarî zî cezaya pere dîyaye. Dosyaya ci di serrî yo mehkeme de ya û hema netîceyêke çin a. Nêzanîyeno ke dosya şîya kamci daîre. Tewr peyîn şîbîye daîreyê cezaya 16. Ma pabeyê tarîxê roniştişî yê. 

Zîndaê Tarsusî de koxuşê xoseran aye rê ame ferzkerdene. Garîbe semedo ke qebûl nêkerd û binpaykerdişê heqan ma rê neql kerd cezaya hucreyî dîyaye ci. Dima surgunê zîndanê Bunyanî bîye û raşta hema meseleyan ameye.'' 

Halîme vat, Garîbe tewr peyîn surgunê Kandira bîye û vat: "Garîbe vat, sebebê binpaykerdişê heqan îdareyê zîndanî yo. Semedo ke cezaya hucreyî estbîye a 22 rojan hucre de mende. Uca ra îna a berde hucreyê yewkesî. Aye waşt şêra verê embazanê xo, waştişnameyê ci nêameyî tesdîqkerdene. Îdareyê zîndanî bi fekî vato, 'ma waştişname tesdîq nêkenê îdare nêwazeno to dir pêvînayîş bikero.' Garîbe nê qebûl nêkena û 7-8 gardiyanî aye derb kenê û erd ra kaş kenê. Cilê aye perçe benê. Gardîyanê camêrdî zî mîyan de bîyê. Aye kenê hucreyêk ke embazanê ci ra dûrî bi. Semedo ke a dana berî ro aye kenê odaya sungerî. Uca de gardiyanê camêrdî danê piro. 

Garîbe vat, psîkologa zîndanî şîya ver û tehdîd kerda. Garîbe zîndan de bi nêweşîya astimî kewte. Garîbe benê odaya sungerî. 24 saetan uca de manena. 24 saetan bi kamerayan dir yena temaşekerdiş û mecbûr manena verê kamerayan de şêra tuwalet. Wexto ke Garîbe benê odaya sungerî sereyê aye gineno dês ro û gonî yena. Vera revîrî benê wareyê cayê pêvînayîşî. Uca de zî bi tewirê doktorî dir têrî bena. Waştişnameyê, ‘mergê xo ra ez berpirsîyar a' danê îmzakerdene." 

Dayîke Halîme qiseykerdişê xo rê wina dewam kerd: "Ma roja yewşemeyî bi telefonî tede qisey kerd. Gardîyanî hertim erzenê serê odaya înan. Bi şewe saete 12.00 de hûmaritiş yeno ferzkerdene. Hîn gardiyanî heqeretan kenê. Garîbe tebera wanena la kitabê ci nêdanê. Tepişteyê ke benê nêweşxane zî dermankerdişê bi kelepçe ferzê înan kenê. Semedo ke tepişteyî qebûl nêkenê peyser agêrenê. Avûkatê ÎHDyê Îstanbulî hewteyê vîyarteyî de şîyî verê Garîbe û derheqê mudurê zîndanî, doktor û gardiyanan de muracatê sucî kerd. Ez di serrî yo kênaya xo nêvînena. Yewin waştişê mi oyo ke kênaya mi bîyarê nêzdîyê ma yan zî bidê verê embazanê ci."