Dewleta tirke ke çeteyê kiriştî Azarbaycan û şerê azarî-armenî da destpêkerdene, îdîa kerdbi ke Têgêrayîşê Azadîye yê Kurdî şerwanê xo semedê şerkerdişî şawitê Armenîstan.  Endamê Komîteya Têkilîyanê Teberî ya KCKyî Ronî Serdemî  vera nê xebaranê zuran hêrsê xo ard ziwan û vat bawerîya înan bi xo nê vatişanê ci rê çîn a.

Ronî Serdemî ke ANFyî rê qisey kerd nê vatî: ''Çarçewa planê Tirkîya de xeta Kafkasî de şerêkê neweyî dest pêkerd. Hetê nê şerî şarê armenî û azarî yê. Şero ke sey şerê Azarbaycan-Armenîstan yeno namekerdene eslê xo de şerê Tirkîya yê leteyê projeyê osmanîye yo. Dewleta tirke Rojhelatê Mîyanênî, Afrîkaya Vakure û xeylêk cayanê Kafkasya de şerî îxraç kena û pîya bi çeteyan xeylêk hêzan serî ra şerî dana rayraberdene. Dewlet tirke bi destê grûbanê teror û çeteyan şaran qetil kena û dinya zî naye rê çimanê xo qefilnena.

Ajans û rojnameyanê tewr pîlan ê dinya bi kanitan da zanayene ke dewleta tirk a faşîste semedê destpêkerdiş û rayraberdişê nê şerî Sûrîye ra bi hezaran çeteyî kiriştî Azarbaycanî. Çeteyê ke hetê dewleta tikre ra ameyî şawitene înan roportajî zî dayî. Dewleta tirka ke planê ci yê leymin vejîyayî meydan vera têgêrayîşê xebaranê zuran vila kena.

Verî  medyaya sosyale de bi destê trollanê xo vat ke gerîlayê PKKyî şîyî Armenîstan la dîyî ke çew naye ra bewerî nêkeno narey sey hukmat û dewlete zure kerde fermîye. Çayo ke wazena tede şer vejo vana ûca 'PKK  û kurdî estê.'  Na propaganda eynî wextî de polîtîkaya şerê taybetî ya û dişmenîya vera kurdan a. Bi nê xeberanê zuran sere de kurdî vera şaran dişmenîye xorî kena û wazena şaranî biverdê yewbînan.

Dewleta tirke ke tarîx û roje ma de tim vera şaran qirkerdişan kena bi nê polîtîkayanê xo yê hêrişkar û nîjadperastan şaranê kurd, armenî, rum, asûrî-sûryanî û şaranê bînan sey înan rê tim sey dişmenî vînena û hêrişê înan kena. Bitaybetî serranê peyênan de dewleta tirka ke tewr tay aşme de reyêke warê mîyanneteweyî de krîz vejena hînî şaranê dinya rê bîya bela.

No rejîmê tirkî ke şer beno her ca, bêîstîkrarîye aferneno, nê ra ganî hînî bêro xelisyayene. Hînî wextê rijnayîşê rejîmê faşîstî yê AKP-MHPyî ameyo. Ganî heme şarî û hetê demokrasîyî bibê yew û pêro pîya nê rejîmê faşîstî bidê war.''