Vizêr polîsan Amed de eştbi Şubeyê Komeleya Heqanê Merdiman (ÎHD) ser. Ewro verê Edlîyeya Amedî de sereştişê polîsan ame protestokerdene. Yewîya Odayanê Mîmar û Muhendisan (TMMOB), Weqfa Heqanê Merdiman a Tirkîya (TÎHV), Komeleya Huqûqnasanê Seba Azadîye (OHD), Sendîkayê KESKî, Baroyê Amedî û xeylêk temsîlkarê rêxistinanê komelê sivîlî tewrê çalakîye bîyî.

Hemsereka ÎHDyî ya Amedî Abdullah Zeytunî da zanayene ke Îdarekarê ÎHDyî ya Amedî Ferhat Berkpinar çarçewa kayêkê Serdozgerîya Komare de ame destbendkerdene. Zeytunî îfade kerd ke Mehkemeya Cezaya Sulhe ya Amedî bira destbendkerdişî daye û dadgerîye komele sey ''kargehê Berkpinarî'' qebul kerda. Zeytunî vat: ''No binpaykerdişê heqanê merdiman o. Ma reyna eşkera vanê ke no kargeh nîyo, komele ya. Berkpinar pawitoxê heqanê merdiman o. Ê wazenê komeleya ma sûcdar bikerê, bidê hedefkerdene. Ma Heyetê Dadger û Dozgeran (HSK) rê gerreyê dadgerê cezaya sulhe kerd ke destûrê cigêrayîşî dayo.''

Sekreterê TMMOByî yê Amedî Dogan Hatunî zî ard ziwan ke ÎHD rîyo sipî yê nê welatî yo û vat: ''Çew nêeşkeno ÎHD sey kargehî bimojno, berê ci bişikno. No sereştiş sûc o. Berê ÎHDyî berê hes kesî yo. Hêzê înan do pê ma nêeşko.''