Serdozgerîya Komare ya Amedî binê nameyê ''PKK/KCK'' de tehqîqato ke DBP keno hedef da destpêkerdene. Na çarçewe de Hakîmîya Cezaya Sulhe bire daye ke pêro bînayanê rêxistinanê şaristanî yê DBPyî de cigêrayîş bêro kerdene.

Sere de Amed de 9 şaristananê Vakurê Kurdîstanî de polîsan eşt bîna û keyeyan ser. 

Çarçewa tehqîqatî de derheqê 15 kesan de bira destbendkerdişî dîyaye. Heta nika Hemsereko Pêroyî yê DBPyî Keskîn Bayindir zî tede 14 kesî ameyî destbendkerdene.

Nameyê tay destbendkerdeyan wina yê: ''Hemserekê DBPyî Keskîn Bayindir, Hemserekê DBPyî yê Amedî Hayrettîn Altun û Sevale Gulmez, Hemserekê Şirnexî Zekî Îrmez, Hemserekê Wanî Şengule Polat û Harun Okay, Hemserekê Riha Rabîa Aslan û Hîdayet Enmek, Hemserekê Dîlokî Erhem Onal û Zelîha Aslan, Hemserekê Mêrdînî Şerafettîn Aslan û Sureyya Dundar, Hemserekê Agirî Melîk Ozmuş''

Sereştişê vera Rêxistina Mûşî de karkerê DBPyî Mîkaîl Kiliç û Celal Doner, Faruk Kuçukçelebî û Yilmaz Tamkan ameyî destbendkerdene.

Çarçewa heman tehqîqatî de Anqara de Balgat de Merkezê Pêroyî yê DBPyî de cigêrayîşî ameyî kerdene. Kuçe de dekewtiş û vejîyayîşî ameyî qedexekerdene û dest nîya defter, dokuman û xeylêk belgeyan ser.

Polîsanê tirkan dest na fotografê Wekîlê DEPî Orhan Doganî û fotografanê Endamanê Meclîsê Partîye yê DBPyî Cîhan Denîz û Husnu Ablay ê ke qezayê trafîkî de dinyaya xo bedilnabî ser. Fotografan reyde polîsan bi îdîaya 'delîlê sûcî' dest na xeylêk kitaban ser zî.