Tirkîya de îşkence û binpaykerdişê heqanê merdiman serra 2022yî de zêdîyayî. Endama Heyetê Rayberdişê Merkezî yê Komeleya Heqanê Merdiman (ÎHD) Nuraye Çevîrmen derheqê binpaykerdişê heqanê tepişteyan û merganê şikdaran de ANFyî rê qisey kerd.

Çevîrmene vist vîrî ke zîndanan de 1517 tepişteyê nêweşî est ê ke rewşa 651ê înan giran a û vat: ''Xeylêk tepişteyê nêweşî kokim, astengdar, nêweş ê. Dermanî nêdîyenê înan. Nêzdîbîyayîşanê binpaykerdişê rûmetê merdimatîye ra tepişteyî nêeşkenê nêweşxaneyan. Zîndanan de doktor û personelê weşîye bi qîmî çin ê. Doktorî rojanê dîyarkerdeyan û saetanê dîyarkerdeyan de muayene kenê, no zî beno sebeb ke tepişteyî îmkananê weşîye ra bêpar bimanê.''

Çevîrmene ard ziwan ke tepişteyan de nêweşîyê giranî est ê la rixmê ney zî hucreyê yewkesî de tepişîyenê. Çevîrmene vat: ''Tepişteyî bi qîmî nêeşkenê werdî biwerê. Tepişteyê nêweşî nêeşkenê werdê dîyetî bivisnê destî. Awa pakîye û awa germe nêdîyena. Malzemeyê kantînan kêm ê û vay ê. Seba ke Dezgehê Tipê Edlîyî bi tewirêkê sîyasîyî nêzdîyê înan beno tepişteyê nêweşî vera nêdîyenê. Tepişteyî zîndanan de terkê mergî benê.''

Çevîrmene da zanayene ke 2022 de zîndanan de nê tepişteyan dinyaya xo bedilnaya:

Ramazan Tûran, Mehmet Hanefî Bîlgîn, Tûrgay Denîz, Bedrî Çakmak, Hayrî Karaş, Sînan Kaya, Şervan Can Guder, Abdo Baran, Mehmet Sevînç, Seyît Şahîn, Abdûllah Ece, Ferhat Dogan, Siddik Ûgûr, Kadrî Ekîcî, Zulfu Yildirim, Mehmet Candemîr, Bazo Yilmaz, Bariş Keve, Suphan Çabûk, Emre Abalak, Tahîr Gurdal, Nevzat Çapkin.