Esvet Şenyaşar û wird lajê ci Adil û Celal Şenyaşar ê ke qezaya Pirsûsî ya Riha de 14ê hezîrana 2018î de hetê merdimanê wekîlê verênî yê AKPyî Îbrahîm Halîl Yildizî û pawitoxanê ci ra ameyî qetilkerdene, serrgêra 6ine ya şehadetê înan de serê mezelanê xo de ameyî yadkerdene.

Yadkerdişo ke Goristanê Asri yê merkezê Pirsûsî de ame kerdene Hemsereka Pêroyî ya DEM Partî Tulaye Hatimogullari, Hemserekê Pêroyî yê DBPyî Keskîn Bayindir, Emîne Şenyaşara ke qirkerdiş de mêrde û di lajê ci ameyî kiştene û xeylêk kesî tewrê ci bîyî.

Emîne Şenyaşar xeylêk wext serê mezelê heskerdoxanê xo de lawikî vatî û hesir kerdî war. Badê yadkerdişî Tullaye Hatimogurllari ya ke verê goristanî de qisey kerd, qewimîyayîş sey qirkerdişî name kerd û vat: ''Seba ke qetilkar wekîlê AKPyî yo heme delîlî ameyî çînkerdene. Kiştoxî yenê pawitene. Mêrde û di lajê Emîne Şenyaşar ameyî kiştene  lajê ci yo bînî zî zîndan de yo, senî ke cezaya muebetê giranî bidîyo ci. Ma tîya ra veng danê, wa Wezîrîya Edaletî zî bieşnawo; şima qirkerdişî rê çimê xo girewtî.

Şarê kurdî çok nêda do çok medo zî. Dayîkê Haştîye, dayîkê nobeta edaletî û  dayîkanê sey dayîka ma Emîne no têkoşîn pîya bi şarî girewto paştê xo ser. Dayîke Emîna nika mezelanê wird lajan û mêrdeyê xo ser hesir kerdî war. Hetê bînî ra lajê ci yo bîn zîndan de yo. Wa heme Tirkîya nê dejî bivîno û vera ci hîsgêr bo. Muxalefet, selahîyetdarî wa nê qîrayîşê dayîke Emîne bieşnawî û waştişê ci yê heqdarî bîyarê ca.''

Wekîlê DEM Partî Ferît Şenyaşaro ke qirkerdiş de birîndar xelisîya ey zî nê vatî: ''No qirkerdiş şexsê keyeyê ma de vera heme şarê kurdî ame kerdene. Gama ke qirkerdiş bi polîsan seyrkerdene. Wekîlê AKPyî kiştox o. Peyê nê qirkerdişî de Erdogano zalim est o. Kiştoxî xo peyê Erdoganî de nimito. Coka hukm vinderto. Eke îqtîdarê Erdoganî bêro wardayene kiştox zî pawitioxê ci zî do bêrê muhakemekerdene. Qet yew hêz Erdoganî  medo war zî do tewr peynî de axê dayîkan ey bido war. Heta a roje têkoşînê ma do dewam bikero.''