Seyîd Riza û embazê ci yê ke 87 serrî verî Xarpêt  de ameyî îdamkerdene, Dêrsim de serkêşîya Platformê Kede û Demokrasîyî de ameyî vîrardene.  Şaro ke Kuçeyê Hunerî de ame têhet heta Meydanê Seyîd Rizayî rayra şi. Serekwekîla Koma DEM Partî Gulîstane Kiliç Koçyigit, Hemvervatoxa Komîsyonê Bawerîyan û Şaran ê DEM Partî Yuksele Mutlu û Wekîla Dêrsimî Aytene Kordu zî tewrê aktîvîte bîyî.

Programê vîrardişî babê wendişê duayan û tafînayîşê çeraxan bi rêzgirewtişî dest pêkerd. Qiseykerdişê bi nameyê platformî de bale ameye ser antene ke asîmîlasyono sîstematîk Dêrsim de dewam keno û ame waştene ke wa ozro fermî bêro waştene, arşîvê Dêrsimî û cayê mezelanê Seyîd Riza û embazanê ci  bêrê eşkerakerdene.

Lajê tornê Seyîd Rizayî, Seydalî Poltatî vat: ''Domanê ma do rojêke şima ra qesas bigîrê.'' Dayîkanê elewîyan ra Menşure Dogan zî vat: ''Fotografan de yeno vînayene ke Seyîd Riza û embazê ci warwayî û milê înan de rêzile est a. Na raştîya dewlete ya.''

Serekwekîla Koma DEM Partî Gulîstane Kiliç Koçyigit zî nê vatî: ''Dêrsim 38 nêqedîya, dewam keno. Ewro qirkerdişê bînî yenê kerdene. Xozaya Dêrsimî bi awbend, maden û HESan yena çînkerdene. Yeno waştene ke bawerîya ci bêro çînkerdene. Kenê ke bawerîya Reya Heqî çîn bikerê. Dêrsimî sero polîtîkaya barî yena rayraberdene.

Wazenê Dêrsimî vindertişê ci ra erjanê ci ra raqilnê. Kenê ke têkoşînê Dêrsimî tarî bikerê. Vera nê ganî ma sey tornanê Seyîd Rizayî, domananê Herde Dewreşî, hemrayanê Alîşeran, Zarîfeyan, Sakîneyan, Mazlûman, Îbrahîman wayîrê nê mîrasî bivejîyê. Ma deyndarê înanê ke binê erdî de bêkefen rakewnê. Ganî ma wayîrê înan bivejîyê û têkoşînê înan bidê ciwîyayene.

Ma eşkera û zelal veng danê. Eke şima raşta haştîye wazenê, eke şima samîmî yê, cayê mezelanê Seyîd Riza û embaznê ci vajê. Wa dewlete hesabê sûcanê xo yê ke tîya kerdî bido û ozrê xo biwazo. Ganî ma ewro her wextî ra zafêr bibê yew û vera zilmî vengê xo berz bikerê. Se beno wa bibo ma do qederê xo û ameyoxê  însafê îqtîdarê AKP-MHPyî rê cameverdê. Ma do rayîrê pîranê xo de sereberz têkoşînî rê dewam bikerê.''