Derheqê 28 wekîlanê HDPyî zî fezlekeyî ameyî amadekerdene. Wekîlê Wanî yê HDPyî Sezaî Temellîyî derheqê mesele de qisey kerd.

Temellîyî ard ziwan ke îqtîdar wazeno pê nê hêrişan HDP qels bikero. Temellîyî operasyonê qirkerdişê sîyasî yê 2016î vistî vîrî û da zanayene ke ê rojan ra dima Tirkîya dekewte mîyanê krîzêkê xorinêrî.

Temellîyî vat: ''Îqtîdar pê çaresernêkerdişê meseleya kurdan payan ser o vindeno. Îqtîdar her roje zêdêr nêzdîyê çinbîyayîşî beno û coka tedayanê xo keno zêdêr. Operasyonê Garê zî pê fîyasko qedîya. Herinda ke şima hesab bidê komelî HDP gênê binê ablûqa û fezlekeyan anê rojdem. Çunke ê HDPyî ra tersenê. La şar nêkewt dafika înan. Ma heqdar ê, ma cayê raştî de yê û ma do gamêke apey nêerzê. ma do têkoşînê xo dewam bikerê. Destê înan de mekanîzmaya teda, hêzê çekdarî estê. Îqtîdar seba menfaatnê xo nînan xebitneno. Ganî hayîya her kes3i pê naye biba û her kes vera naye têkoşînê demokrasî û azadîye bikero.''