Komeleya Rojnamegeran a Dîcle-Firatî raporê ''Binpaykerdişê Heqanê Rojnamegeran ê Sibate'' eşkera kerd.

Rapor de ame vîrvistene ke rojnameger Yevhenii Sakun 1ê adare de hêrişê Rûsya yê vera Kievî de kişîya. DFGyî Yevhenii Sakun yad kerd û Rûsya şermezar kerde.

DFGyî raporê xo de pare kerd ke menga sibate de vera rojnamegeran xeylêk binpaykerdişê heqan qewimîyayî û hema zîndanan de zaf rojnamagerê tepişteyî estê. DFGyî bale ante ser ke Mehkemeya Cezaya Sulhî ya Amedî Yeni Yaşam, Xwebûn, Jineolojî û Demokratik Modernite zî tede xeylê kovar û rojnameyî qedexe kerdî. DFGyî vat: ''No nêzdbîyayîşê mehkeme vera çapemenîya azade dişmenî ya û bêhuqûqî ya.''

Rapor de menga sibate ser o nê doneyî ameyî parekerdene:

Goreyê raporî menga sibate de 1 rojnameger kişîya, 3 rojnamegerî maruzê hêrişî mendî, erzîya keyeyanê 3 rojnamegeran ser, 7 rojnamegerî ameyî destbendkerdene, 3 rojnamegerî tepişîyayî, 3 rojnamegerî maruzê têgêrayîşê xirabî mendî, zîndan de vera rojnamegerêkî binpaykerdişê heqî qewimîya, 11 reyî teqîbê xeberan ameyî astengkerdene. Derheqê 8 rojnamegeran de tehqîqat ame akerdene, vera 9 rojnamegeran dewa ameye akerdene, 5 rojnamegeran rê cezaya zîndanî ya 16 serran û cezaya pereyî ya qasê 7 hezar dîyaye, hema zî 119 rojnamegerî yenê muhakemekerdene. Sibate de rojnamegerêk/e karî ra ame/ye vetene, RTUKî ceza daye 10 dezgehanê çapemenîye, 3 kovar û 2 rojnamegerî ameyî arêdayene, derheqê 11 serebûtan de bira qedexeyê weşankerdişî dîyaye, 2 sîteyê înternetî ameyî qefilnayene, 169 xeberî ameyî astengkerdene û 38 tedeyîyê medyaya dîjîtale ameyî astengkerdene.