Rojnameger-nuştox Ender Îmrekî pare kerd ke biranê Dewaya Kobanê sînorê awanbîyayîşê sîstemî ancî ardê vîrê merdiman û nê birî ganî polîtîkayê seserra diyîne ya dewlete yê vera meseleya kurdan bêrê ercnayene.
Rojnameger-nuştox Ender Îmrekî ANFyî rê birê Dewaya Kobanê ercnayî.
Îmrakî da zanayene ke îqtîdarî bi biranê Dewaya Kobanê mojna ke ê do 'Planê Çokdayîşî' de israr bikerê û vat: ''Biranê Dewaya Kobanê sînorê awanbîyayîşê sîstemî ancî ardê vîrê merdiman. Wina aseno ke her hetê na dewaya sîyasîye ameyo plankerdene. Wina aseno ke hêrişê vera şarê kurdî, sîyasetê têgêrayîşê kurdan û sosyalîstan, tecrîd û operasyonê teberê sînoran do dewam bikerê.''
Îmrekî dîyar kerd ke seba ke şarê kurdî weçînayîşanê gulana 2023yî û 31ê adara 2024î de vera îqtîdarî tewir girewto, 'ceza' werda û vat: ''Îqtîdarî sînorê 'nermbîyayîşî' eşkera kerdî. Îqtîdar do otorîterîzm de israr bikero. Xoverdayîşê Gezî û Xoverdayîşê Kobanê hêzê komelî îsbat kerdbî. Dewlete û îqtîdarî bi dewayan wird xoverdayîşî zî ceza kerdî.''
Îmrekî bale ante Dewaya Sînan Ateşî û Ayhan Bora Kaplanî ser û ard ziwan ke dezgehanê muhakemekerdişî ra heta zereyê îqtîdarî mîyanê îqtîdarî de şer est o. Îmrekî vat: ''Şerê zereyî beno germ. Herinda nermbîyayîşî de tûjbîyayîş qewimîyeno. Seba heq, huqûq û edaletî têkoşînêko xurtêr lazim o.''
