Endamê KNKyî û Hemserekê KCDK-E yo verên Tahîr Koçero ke kanûna 2022yî ra nata Almanya de tepişte yo, şaristanê Munichî de roniştişê dewa de cezaya zîndanî ya di serran û panc mengan dîyaye ey. Kurdîstanijan û dostanê înan bire sey 'birêka sîyasî û terefgîre' pênase kerd û protesto kerde.

Sîyasetmedarî Nursele Aydogan û Hemsereka KON-MEDî Rûkene Akça zî roniştiş teqîb kerd. Roniştişî ra dima verê mehkeme de bi eşkerayîyêke bire ameye protestokerdene.

Rûkene Akça eşkerayîye wende û da zanayene ke dewleta Almanya ancî kurdan rê neheqîye kerda û vat: ''Ma rîyê meseleyanê sîyasîyan ra ameyî Almanya la ancî ma raştê heman meseleyan yenê. Zaf kurdê Almanya bi bahaneyanê pûçan zîndanan de tepişîyenê. Ma na bire sey birêka sîyasî û terefgire vînenê û protesto kenê.''

Eşkerayîye bi sloganan qedîyaye.