Partîya Karkeran a Sosyal-Demokrate a Swêdî bi serrnameyê 'Kurd û Kurdîstanî' vernîyazêk pêşkêşê parlamento kerd û waşt ke seba ke kurdî bieşkê çarenusê xo eşkera bikerê parlamento ganî birêke bigêra.
Partîya Karkeran a Sosyal-Demokrate a Swêdî ra 13 wekîlan bi serrnameyê 'Kurd û Kurdîstanî' vernîyazêk pêşkêşê parlamento kerd û waşt ke seba ke kurdî bieşkê çarenusê xo eşkera bikerê parlamento ganî birêke bigêra. Wekîlan vist vîrî ke Tirkîya de 15 mîlyon, Îran de 7 mîlyon, Iraq de 6-7 mîlyon û Sûrîye de zî 1,5 mîlyon kurdî estê û kurdî neteweyo qerabalix ê Rojhelatê Mîyanênî yo.
Vernîyaz de bale ameye antene ser ke kurdî hetê Tirkîya, Iraq, Îran û Sûrîye ra asîmîlekerdene û maruzê teda û zulmanê nê dewletan benê.
Vernîyaz de wekîlan ard ziwan ke goreyê qanûnanê Neteweyan ê Yewbîyayeyan û ê Konseya Asayîşî ya Neteweyan ê Yewbîayeyan ganî kurdî çarenusê xo, bi xo eşkera bikerê. Wekîlan parlamento ra waşt ke sena ke kurdî bieşkê çarenusê xo eşkera bikerê ganî parlamento birêke bigêra.
Nê wekîlan morê xo da binê vernîyazî: Dag Larsson, Abraham Halef, Anna Wikstrom, Ingela Nylund Watz, Leif Nysmed, Mattias Tegner, Serkan Kose, Alexandra Volker, Azadehe Rojhan Gustafsson, Lawen Redar, Markus Selin, Mattias Vespä, Teres Lindberg.
