Rayberê Şarê Kurdî Abdullah Ocalanî ra 25ê adara 2021î ra nata xebere nêna girewtene. Serekkomarê Tirkîya Erdoganî na menge di reyî qala Ocalanî kerde û îdîa kerd ke ''Oyo ke Edîrne de yo do hesab bidê êyê Îmraliyî.'' Dima Erdoganî bernameyêkê televîzyonî de zî wina vatbi: ''Ganî merdim Ocalanî ra pers bikero. Ocalan pê eşkerayîyanê Demîrtaşî qayîl nîyo.''

Rayberê Şarê Kurdî pêvînayîşê 26ê hezîrana 2014î de Heyetê Îmraliyî rê wina vatbi: ''Wa çew nameyê mi ser o qisey mekero. Nameyê mi ser o bi hezaran zûrî vajîyenê.'' Wekîlê HDPyî yê Riha Omer Ocalanî derheqê polîtîkaya tecrîdî, redkerdişê muracatan û nîqaşanê Erdoganî de ANFyî rê qisey kerd. 

Omer Ocalanî vist vîrî ke tewr peyên 25ê adara 2021î de Ocalanî reyde pêvînayîş ame kerdene û vat: ''Avûkatan zî tewr peyên 2019 de o dî. Vera Birêz Ocalanî tecrîdêko giran yeno kerdene la Erdogan her roje nameyê Birêz Ocalanî ser o qisey keno. Nika her kes Ocalanî ser o nîqaşan keno. Ma her hewte muracatê Wezîrîya Edaletî kenê la cewab nêdîyeno ma. Seba ke ma bieşkê pêvînayîşan bikerê muxatan nêvînenê.

Erdogan bi hewteyan o nameyê Ocalanî ser o qisey keno. No çîyo bêmana yo. Şarê kurdî pabesteyê Birêz Ocalanî yo û wazeno Birêz Ocalan avûkat û keyeyê xo reyde pêvînayîşan bikero û rayaumûmîye reyde nînan pare bikero. Îqtîdar seba ke îqtîdarîya xo rê dewam bikero her metodî ceribneno. Nika zî peyê spekulasyonan de yo. Rojdem şiknayîşê tecrîdî yo. Seba ke no tecrîd bêro şiknayene ganî ma bixebitê û sîyasetmedarî debikewê dewre. Ganî Birêz Ocalan bieşko fikr û hîsanê xo pare bikero. La vera Birêz Ocalanî tecrîd yeno caardene. Birêz Ocalanî hişyar kerdbi ke wa çew nameyê ey ser o qisey mekero. Wa her kes hedê xo bizano û nameyê ey ser o qisey mekero. 

Erdogan seba ke îqtîdar de bimano her çi keno, nîqaşanê pûç û vengan keno . Mesele tecrîdêko giran o. No vera exlaqî yo. Ganî Birêz Ocalan qisey bikero.  Ma tim seba pêvînayîşî muracat kenê la na babete de muxatab çin o, pêro muracatê ma hewa de manenê. Birêz Ocalan Îmrali de vera tecrîdî têkoşînêkê pîlî keno. Ma tira xebere nêgênê û coka qerqilîyenê. Têna grevê vêşanîye yê embazan ra dima tay pêvînayîşî ameyî kerdene. Seba şiknayîşê tecrîdî têkoşînêko bêhempa lazim o. Ganî berê Îmraliyî bêrê akerdene. Seba ke tecrîd wedarîyo ganî ma bixebitê. Na mesuldarî kewena milê her kesî. 

Tecrîd nîşaneya nêzdîbîyayîşê bi meseleya kurdan o. Şer, înkarkerdiş û tecrîd mesele çareser nêkenê. Îqtîdar bi geşkerdişê neteweperestîye xîret keno ke pê tecrîdî payan ser o bimano. Heta ke berê Îmraliyî anêbo her çi spekulasyon o. Ganî ma vengê xo berz bikerê.''